Nongpoh, Naiwieng 26: Ki nongialam ka Hynniewtrep Achik National Movement (HANM), Western Zone hynne ka sngi ki la pynpaw ia ka jingsngewkhia kaba jur halor ka jingkuman jong ka sorkar Meghalaya ban tuklar halor ka jingpyntrei ka Sorkar Assam ia ka surok hapoh ka shnong Baghlapara kaba hap hapoh ka Hima Nongspung.
Ka HANM, Western Zone ka la pynpaw ia kane halor ka jingnang iaid shaid shaid ka jingtei ia u surok ha ka shnong Baghlapara kaba hap hapoh ka Hima Nongspung, Raid Warmawsaw ,kaba la tei da ka tnad PWD Assam ha ka jinglut ka T.71.59 lak ia ka surok ba 1.203 kilometer.
Haba pyntip ia kane, u Samla Sumar Lyngdoh, president ka HANM, Western Zone, u la iathuh ba ka seng ka dap da ka jingsngewkhia namar ka jingkuman jong ka sorkar Meghalaya khamtam ka Regional Committee kaba dang pynkhreh ia ka jingiakren pynbeit pud ban tuklar halor kane ka kam tei surok jong ka Assam ha ka shnong Baghlapara kaba la nang iai trei bad sah ban pyndep syndon ia ka.
U la iathuh ruh, ba watla kiba bun balang khamtam ki bor ka Hima Nongspung ki la dep ban dawa na ka sorkar Meghalaya ba kan tuklar lem halor ka jingiai kyntur pud jong ka Assam da kaba pynbiej da ki kam pynroi ha ki shnong khappud kum ka jingtei ia ki surok bapher bapher khamtam hapoh ka shnong Baghlapara, hynrei la sakhi ba haduh kine ki kynti kam shem la don satia kano kano ka jingshimkhia na ka liang ka sorkar Meghalaya.
“Kaba sngewlyngngoh ka long ba ka sorkar Assam ka la nud ban pynkhein ia ka soskular ba la ia soi ban pynsangeh shwa ia ki kam pynroi ha ki shnong khappud jong ki ar jylla katba ki jingiakren pynbeit pud ka dang iaid shakhamt”, ong u Samla Sumar Lyngdoh da kaba kyntu ia ki bor ka sorkar Meghalaya ba kan phaikhmat mardor halor kine ki kam kyntur pud ka Assam ha ki jaka jong ka jylla Meghalaya.
