Shillong, Iaiong 01 : Ki Pulit kila lap ia ka metiap jong uwei u khynnah 16 snem, uba dang pule klas X, ha jingkieng Umpling hynnin ka sngi Ba-ar.
U Superintendent of Police Bah Vivek Syiem ula ong “Ia une u khynnah lah wanrah iap sha Bethany Hosptal, ha kaba la pynbna ba ula khlad. Ula mih na iing ha ka por 1:30 baje janmiet bad ki Kmie Kpa kila ioh ban iakren phone bad u ha ka por 6 baje janmiet, haba iathuh ba u don ha jingkieng Umpling”.
U Bah Vivek u bynrap “Ia une u khynnah la lap hapdeng ka jingiapler bad phlei snam na khmut. Ym lap dap mong satia ha ka met jong u, lait noh tang ka jingphlei snam na khmut bad ka jingkylla rong ka rymmiang shyntur. Ia ka met la phah leh post mortem ha NEIGRIHMS ban pynthikna ia ki daw ka jingiap”.
Ka jingshem jong ka jingtohkit ba dang shu sdang, ka pynpaw ba kam idon satia kano kano ka dak ba ong ba une u khynnah u shah shoh hynrei ki Pulit ki dang ap ia ka kaiphod Toxicology bad post mortem ban shai.
