Shillong, Jylliew 22: Ka All India Trinamool Congess (AITC) hynne ka sngi baling, kala rakhe ia ka sngi kha jong u Kpa ki dak Khasi u Rev Thomas Jones ha Police Bazaar.
U President ka State TMC Students Union samla Bansharailang Pyngrope, President ka Ri-Bhoi TMC Students Union Paiabaskhem Kharkongor bad General Secretary ka State TMC Students Union Damiyo Lamare bad kiwei kiwei kila iadon lang ha kane ka jingrakhe.
U samla Damiyo ula iaroh ia u Rev Thomas Jones ba wat la um dei satia u Khasi, hynrei ula pyrshang pat ban kyntiew ia ka Jaidbynriew Khasi da ka jingmut kaba bha, ia kaba ka Jaidbynriew Khasi kam lah shuh ban siew kylliang.
U samla Bansharailang ula pynpaw ia ka jingsngewnguh ia Rev Thomas Jones halor ka synniang ba ula noh sha ka imlang sahlang. Ula ong “Ngi wan hangne kum ka dak ban burom bad sngewnguh ia ka synniang jong une u riewkhraw ia ka Jaidbynriew jong ngi. Ka dei ka synniang jong u ba ka Jylla jong ngi kala poi haduh une u pud ba mynta”.
“Dei ka synniang jong u ba ngi la iakhun ban ioh iala ka jong ka Jylla, ban ioh ia ki doctor, ki engineer, ban lah pynmih ia u Chief Election Commissioner ka Ri bad bun kiwei kiwei” ula ong.
