Guwahati, Jylliew 22: Ki MLA ialeh pyrshah jong ka Shiv Sena ki la wanpoi ha ka nongbah Guwahati da ka liengsuin hynne ka step sngi Balang.
Kine ki MLA ki ba la don mynta ha Guwahati ki la ialeh pyrshah ia ka party Shiv Sena ka ba la wanrah ka jingeh ia ka sorkar MVA hapoh Maharashtra. Ia kine ki MLA la pynkit noh da ka bus ka ba kyrpang shapoh ka hotel ha kane ka sorbah ha ryngkat ki lad jingiada ba kyrpang na ki bor pulit.
U Myntri ka Shiv Sena ha Maharashtra u Eknath Shinde u la ialeh pyrshah ia ka party da ka ba ialam noh ia katto katne ki MLA shapoh ka jylla Assam ka ba synshar da ka Seng BJP. Na ka liang ka sorkar BJP ha Assam ruh ka la pynkhreh halor baroh ki jingdonkam na ka bynta kitei ki MLA ialeh pyrshah ka Shiv Sena ha Guwahati.
Na ka liang ka Seng Congress ka la kynthoh jur ia u Myntri Rangbah (CM) ka Assam, u Himanta Biswa Sarma hadien ba la iohi ia u ha ka por ba u dang mih napoh Radisson Blu Hotel ha Guwahati, kata khyndiat por shwa ka jingwan poi jong kitei ki MLA ialeh pyrshah ka Shiv Sena.
U president ka Congress ha Assam, u Bhupen Borah u la ong ba u CM ka Assam u dei ban pynleit jingmut ha la ka jong ka kam bad ban khmih ha ka ba iadei bad ki kam aijingiarap sha ki paidbah nongshong shnong ka jylla ki ba shah ktah na ka jingshlei um. U la ong ruh ba u Sarma u lah ban leh ia kine ki kam politik ha ki por ki ba suk ba sain hynrei ym kum ha ka ba kum kane ka por ha ka ba ki paidbah ki la mad ia ka jingeh bad donkam kyrkieh ia ki jingiarap na ka sorkar.
