Guwahati, Jylliew 22: Ka jingdon jong ki briew kiba shah ktah na ka jingshlei um ha Assam kala kiew sha ka 55 lak ngut, kiba dei na ki 32 tylli ki District kiba shah lynshop jur eh ha ka jingshlei um.
Ka jingkiew jong ka um ha ki artylli ki wah ba kongsan ka Assam, kata ka Barak bad ka Brahmaputra ka la poi sha u dak jingma. Ka jingshlei um ha ki jaka them ka Barak Valley ka la nang kham sniew shuh shuh. Ki ba bun ki surok bad ki lynti rel ba kongsan ha Barak Valley jong ka Assam ki la shah pynjulor lut.
Ha kine ki arphew saw kynta bala leit noh, sa 7 ngut ki briew kila iap ha ka jingshlei um jong kine ki artylli ki wah.
Na ka liang u myntri rangbah ka jylla u Himanta Biswa Sarma u la pyntip ba ia ki song jingiarap sha ki paidbah nongshong shnong ki ba la shah ktah ha ka jylla yn sa pynbna shen.
“Ia ka song jingiarap na ka bynta ki nongshong shnong ki ba la shah ktah yn sa pynbna shen,” ong u CM ka Assam u Himanta Biswa Sarma u ba la bynrap ruh da ka ba ong, “Ka sorkar jong ngi shen kan pyllait ia ka portal na ka bynta kito ki briew ki ba la shah ktah khnang ba kin ioh ban rejister halor ka jingduh noh ia ki jingri jingdup bad kiwei pat ki jingshah pynjulor na ka jingshlei um.”
