Shillong, Jylliew 22 : Ki nongialam ba rangbah jong ka KSU Central Body hapoh ka jingialam jong u President, Samla Lambokstarwell Marngar bad u General Secretary, Samla Donald V.Thabah, ha ka sngi Balang ki la leit ban pynkup burom kyrpang ia i samla Amebaaihunsha Kharbhih iba la ioh ban wan ha ka kyrdan kaba hakhlieh duh ha ka result Secondary School Leaving Certificate (SSLC) ba la pynbna da ka MBoSE dang shen.
Itei i samla i dei ki khun jong i Bah Babunlad Syiemlieh bad i Kong Banrilin Kharbhih kiba shong ba sah ha Mawreng East Khasi Hill District.
Lah ban kdew hangne ruh ba itei i samla i dei i khynnah skul jong ka St. Paul’s Higher Secondary School, Marbisu.
Ka jinghiar hi ki nongialam ka Seng sha ka Shnong Mawreng ka long ban leit kynduh ia itei I heprit, ia ki kmie ki kpa bad ia ki ba Haiing baroh namar ym ju kham don koit ba ka khynnah kaba dang lung ha ka rta kan don pat ia ka jingmut kaba iar kum ki Rangbah.
Ka Seng ha ka kyrwoh ka ong ba dei namar kane kaba la pynktik ia ka jingmut jong ki Nongialam haba ki lah ioh sngew ia ka kyntien kaba mih na i kaba i ong, “Dei ban ialeh shitom ban tam shakhmat ia kiwei pat ki jaidbynriew.”
Ka KSU ka ong ruh ba ki sngew sarong namar jong i, ka Jaidbynriew kan sa nang kiew kham shajrong ha ka pule puthi. Da kaba kyntu ba in long i mawkordor jong ka iing ka sem bad jong ka Jaidbynriew, ka Seng ka la pynkup burom ruh ha ka rukom kaba shongkun bha ia i ha katei ka sngi.
