Shillong, Jylliew 26: U Myntri kam pohiing barim ka Jylla Bah H.D R Lyngdoh ula shim rai ban pyniasoh noh ialade sha ka United Democratic Party (UDP) ban long u kyrtong kane ka seng riewlum ha ka elekshon MLA-2023 na Sohiong Constituency.
U Bah H.Donkupar Roy Lyngdoh uba dei u MLA/MDC barim ka Sohiong, un pyniasoh ialade sha ka UDP ha ka 29 tarik mynta u bnai ha ka jingialang ban long ha Shiliang Dongki, Sohiong.
Ka Sohiong Constituency ka dei kaba mihkhmat mynta da u Bah Samlin Marbiang jong ka Hill State People’s Democratic Party (HSPDP), kawei pat ka seng riewlum kaba iatreilang bad ka UDP ha ka Regional Democratic Alliance (RDA) naduh ka elekshon MLA 2018.
U Bah Samlin ula pynrem ia u Bah H.D R Lyngdoh uba aireng na ka Congress ha ka elekshon 2018 da 622 vote. U Bah Samlin ula ioh 11960 vote katba u Bah HDr Lyngdoh uba wan ba-ar ula ioh 11338 vote.
Dang shen u Bah HDR Lyngdoh ula pynbna ia ka jingmih noh na ka seng Congress namar ka jingiohi ba kane ka seng baheh duh hapoh ka Ri, kala tlot mynta daka jingiapait iapra bad ki MLA kynthup ia ki 12 ngut kiba la phet sha ka All India Trinamool Congress (AITC) bad ki 5 ngut kiba dang don hapdeng ka jingshah sospon.
Ka khubor ka iathuh ba ki nongialam jong ka UDP kin sa pdiang burom ia u Bah HDR Lyngdoh bad ia ki nongkitkam ki jong u shaka seng UDP bad kin sa pynbna paidbah syndon ba u Bah HDR yn long u kyrtong ka UDP na Sohiong Constituency.
