Shillong, Jylliew 26: U MLA ka BJP na South Shillong Constituency ba Myntri Sorkar Bah Sanbor Shullai, ula sam ia ka song jingiarap ba T.5.40 lak sha ki 11 tylli ki Kynhun jong ka Constituency.
U Bah Sanbor ula pyntip ba kane ka song pisa ka dei jong ka Discretionary Grant jong u snem 2022-2023 bad la sam ia ka sha ki kynhun trei monsngewbha, ki Dorbar Shnong, ki Welfare Society kiba la pynlong ia ki prokram bapher bapher ban iarap ia ki longiing kiba duk, ki samla pule, ki samla bad ki paidbah ha u snem 2022.
Kine ki kynhun kiba ioh ia ka song jingiarap ki kynthup ia ka Raid Laban Secondary School Madan Laban, Shillong bad ka Kench’s Trace Puja Committee kiba la ioh mar T.1. Lak.
Ka Deep Jyoti Socio-Environment Society Lumshatsngi-Kench’s Trace, ka Lumparing Gorkha United Club, Mynsain Lumparing, ka Gorkha Association Jhalupara, ka Synjuk Ki Samla Seng Khasi Ri-Raid Laban, ka Lawei Traditional Dance Group, Greater Laban Area, Shillong bad ka Gracious Givers Foundation, Madan Laban kila ioh mar T.50,000.
Ka Young Mizo Association New Kench’s Trace kala ioh T.20,000, katba ka Meghalaya Taekwondo Training Academy bad ka Jyoti Sroat School Laitumkhrah kila ioh mar T.10,000.
