Shillong, Nohprah 29 : Ka Bharatiya Janata Party (BJP)-Meghalaya hynne ka sngi palei, kala rai ban ujor sha ka Election Commission of India (ECI) pyrshah ia ka manifesto (mat elekshon) jong ka All India Trinamool Congress (AITC) ba kular ban ai song jingiarap pisa sha ki Longkmie ha ka Jylla.
Ka AITC kala pyllait ia kawei na ki jingkular mat elekshon ba la jer kyrteng ka Meghalaya Financial Inclusion for Women Empowerment lane We Card myn ha ka 13 tarik Nohprah. Kane ka skhim ka kular ban iarap pisa ba T.1000 shibnai ia iwei pa iwei I Longkmie kum ka jingkyrshan ia ka kamai ka kajih.
Tad haduh ka 26 tarik Nohphrah, palat 90,000 ngut ki Longkmie kila pynrung kyrteng ialade ban ioh ia kane ka skhim jong ka AITC.
Haba kren sha ki lad pathai khubor, u President ka BJP-Meghalaya Bah Ernest Mawrie ula ong “Ngi la rai ban mudui da ka jingujor sha ka ECI pyrshah ia ki jingkular mat ialap elekshon ka AITC halor ka nongrim ba…ka para phra jong ka model code of conduct (MCC) kala ong ba ka Election Manifesto (mat ialap elekshon) jong kino kino ki seng sain pyrthei kin hap ban iaid kat kum ki kyndon bala buh da ka ECI kat kum ka article 324. Ka Rule 3,2 jong ka part ba phra ka MCC kala ong ba ki seng sain pyrthei ki dei ban kiar ha kaban ai kano kano ka jingkular kiba lah ban lam sha ka jingleh bym hok….ka jingai sngewbha/jingtyrwa/jingkular sha kino kino ki briew da ka jingthmu lane ban ioh jingmyntoi pat hadien bad kano kano ka jingpyrshang ban tuklar na ka liang ki kyrtong ba iadei bad ka hok ba laitluid ban jied ia ki nongmihkhmat”.
“Kam don jingiapher hapdeng kane ka skhim bad ka jingsam pisa sha ki longiing ba duk shuwa ka elekshon khnang ban thied ia ki vote hynrei ka shu iapher noh tang ka por. Ka jingsam pisa ka jia ha ka por elekshon hynrei ka jingkular ia kane ka skhim ka dei kaba jia hadien ka elekshon lada jia ryngkhat ba ka AITC ka wan ha ka bor” ula ong.
U Bah Ernest ula ai nuksa ia kane halor ka elekshon ba dang shu dep jong ka Uttar Pradesh Vidhan Sabha ha kaba ka Samajwadi Party (SP) kala pynbna ia kum kine ki jingkular kata ban ai bording ei.
“Ka SP kala kular ban ai ei 300 unit ka bording bad kyntu ia ki nongshongshnong ban pynrung kyrteng ha ka website jong ki ba kin ioh ia ka jingmyntoi lada ka party ka wan ha ka bor ha UP. Hynrei ka Election Commission kala shimkhia ia kane bad kala phah tohkit ia kane ka sienjam jong ka SP” ula ong.
Kat kum ka jingong jong u, ka SP kala hap ban pynsangeh hadien ka jingbthah jong ka Election Commission.
Haba pynpaw ba ka ECI kam pat pynbna satia ia ka elekshon ha Jylla, u Bah Ernest ula ong “Ka AITC kam pat pynbna paidbah satia ia ka mat ialap elekshon (Manifesto) ba pura. Kam don jingartatien ba kane ka skhim ka dei shibynta na ki jingkular ha ka mat ialap elekshon ka AITC ha Meghalaya bad ka Election Commission ka dei ban shimkhia ia kane”.
