Nongpoh, Nohprah 29: Ki paidbah ka sor Nongpoh kila her syrngiew hynne ka janmiet sngi palei na ka jingbthei kynsan jong ki bomb pataka bad bomb bula bala die paidbah hapoh kawei ka kali ba pynlong iew ha surok iaid paidbah.
Kane ka jingjia kala jia ha ka por 5:30 baje eiei katba ka iew die bomb pataka ka dang thnem bha ban pynkhreh ia ka jing lehkmen ban pdiang ia u Snem Thymmai.
Kat kum ka khubor Pulit, la iathuh ba kane ka jingbthei kala mih na ka jingpyrshang ban pynbthei ia uwei u bomb hynrei kynsan kynsan ka ding kala pur sha kiwei kiwei ki bomb bad mih ka jingbthei ka bym sngewthuh sngewthaw shuh.
Ki iathuh ba u briew ba die ia kine ki bomb pataka u dei uba la tip kyrteng u Meshan Nongrum ba na ka shnong Umsning bad u dei ruh uba ju wan die ia kine ki bomb ha kawei ka Maruti Van kaba don u nombor ML10-B-3580.
Ha kane ka jingjia, ym shym la don kiba mynsaw. Ka jingbthei kala jur bha haduh b aka ding kala sdang pur ia ka kali hynrei da ka jingwan iarap ki paidbah ban synreit da ka um, tang hadien katto katne la lah ban pynlip noh ia kane ka jingbthei.
