Shillong, Nohprah 29 : U President ka Meghalaya Pradesh Congress Committee (MPCC) ma Vincent H Pala hynne ka sngi palei, ula kyrpad ia ki nongshongshnong ka Jylla ban ai ka lad ia ka Congress ba kan ialam ia ka Sorkar ha u 2023.
“Ngi kyrpad ia ki nongshongshnong ka Jylla, ban ai lad ia ngi ha u 2023. Ngi donkam ia ka absolute majority ban pynthikna ia ka jingskhem khnang ba ngin lah ban iada ia ki briew lajong la ka dei ha khappud ne ki Khristan, ne la ka dei ka shongsuk shongshngain” ong u ma Pala haba iakren bad ki nongthoh khubor.
Haba kynnoh ba ka Sorkar MDA kam shym la lah ban treikam ha baroh ki bynta, une u MP ula ong ba ka por kala dei ban wanrah jingkylla bad tang ka Congress ka dei ka lynti ia ki paidbah ka Jylla Meghalaya.
“Ka Congress ha kane ka kynti ka dei ka Congress na ka bynta ka jingkylla. Ngi don ia ki durkhmat ba thymmai bad ngi don ia baroh ki stad ki jhad (ban leh eiei halor ki ishu kiba ktah ia ka Jylla bad ki nongshongshnong” ula ong.
Haba kren halor ka iohkam iohjam, une u Nongialam ka Congress ula ong “Kumba ka long hi, kam don satia ka system haba ki samla kin ioh ia ka rynsan ban tip ia ka jingdonkam bad jinglaitkam (demend and supply). Kum ka nuksa, nga pass M.Com, mano ban aikam ia nga. Ngi donkam ban don ia ka system ne ka rynsan”.
Ula kular ruh ba ka Congress kan sa wanrah ruh ia ka State University ban pynthikna ba ki samla pule kin ym mad jingeh ha kaban ioh rung klas ha ki university.
“Ka Congress kan khmih ruh iaka bha ka miat ki nongrep namar haduh 70-80% na ki briew jong ngi ki dei ki nongrep ha ka Jylla” ula bynrap.
Ha kajuh ka por, une u khlieduh ka Congress ha Jylla ula ong b aka Congress kam don jingkwah satia ban don ka jingiatreilang bad kano kano ka party hashuwa jong ka elekshon MLA-2023.
“Ngi don jingmut ban pynmih haduh 60 ngut ki kyrtong bad ngim don jingthmu ban don ka jingiatreilang bad kino kino ki party. Nga sngew skhem ba ki paidbah ha kane ka kynti kin ai ka jingshaniah ha ngi” ula ban.
