Guwahati, Lber 27: Ka BJP ka la pynkhreh bha na ka bynta ka elekshon sha ka iingdorbar thawain bad ki nongialam kila kiar ban iathuh lypa ia ka jingbun ki seat ba ka NDA kan jop na ki constituency jong ka elekshon 2026.
Ha u snem 2016 ka BJP ka la jop 60 tylli bad ha u snem 2021 ha kaba sdang ka la jop 60 tylli kaba hadien ka la nang kiew sha ka 64 tylli ki seat.
Ha shwa ka elekshon 2021 ka BJP ka la ai ka jingkein kaba shai bha ba kan jop 100 tam seat ha ka ïing dorbar kaba don 126 ngut ki dkhot.
U myntri rangbah ka Assam u Himanta Biswa Sarma haba iai kylli bunsien ia ka jingdon ki seat ba ka NDA kan ioh ha kane ka elekshon, u dang pynneh ba ka BJP kan ioh palat ia ka 50 percent ka vote share.U la ong, “Ngin sa ioh ia ka jingjop kaba khlem pat ju jia mynno mynno ruh bad ka ban don histori ha kane ka kynti ba mynta.”
Ha ka elekshon sha ka iing dorbar thawain mynta u snem 2026, ka BJP, ka pynieng ban phah ia khun 90 ngut, katba ki paralok jong ka, ka Asom Gana Parishad, ki pynieng 26 ngut bad ka Bodoland People’s Front, ka pynieng 11 mhut. Ha kawei na ki constituency, kan don ka “jingiakhun paralok” hapdeng ka BJP bad ka AGP.
Ka BJP ka khmih lynti ban ioh bat ia ka samoi kaba lai ha Assam bad ki sngewskhem ban thaw ia ka sorkar NDA.
Ka jylla Assam kan leit sha ka elekshon tang ha ka wat kaba nyngkong bad kata kadei ha ka 9 tarik u Iaiong 2026.
