Shillong, Jylliew 28: Ki Pulit ka East Khasi Hills hynne ka sngi ba-ar kila rah ia ki katto katne ngut ki samla ban tohkit halor ka jingsuba donkti ha ka jingshoh ia ki arngut ki samla na Kerela ha Jaiaw Pdeng.
U Superintendent of Police (City) Bah Vivek Syiem ula iathuh ha ki nongthoh khubor ba ka kam ban pynithuh ia ki briew kiba donkti ha kane ka jingjia ka dang iaid shakhmat.
Lah ban kdew hangne ba kine ki samla na Kerela ki dei kiba wan hikai pynshemphang ialade (intern) hapoh ka seng Impulse Ngo Network. Kine ki samla ba kyrteng u Rejaz Sydeek bad u Sarath Thambi, kila shah thombor ha ka 24 tarik u Jylliew ha Jaiaw Pdeng.
“Ka jingrah ia kine ki samla ka long thik tang na ka bynta ban pynithuh ia ki briew kiba donkti” ula ong haba kyntait pat ban iathuh ia katno ngut ki samla ba ki Pulit kila rah tohkit.
Une u Heh Pulit ula kyntait ruh ia ka jingkynnoh ba ki don haduh 10 ngut ki samla kiba la shah rah na ki thain Jaiaw bad ong “Kam don jingshisha satia halor kane namar kam dei kaba shisha”.
Haba kylli la kine ki samla ba shah rah ki dei jong kano kano ka seng, u Bah Vivek ula ong “Ki briew ki lah ban don jingiadei bad kino kino ki seng hynrei kane kam don jingmut. Kaei kaba donkam hi ka long la ki dei kiba donkti shisha ne em bad ia kane ngin hap ban pynthikna”.
Kat kum ka jingong jong u, ki Pulit kila shimkhia ban tohkit ia kane ka kam na baroh ki liang kynthup ia ka jingshim sakhi na ki briew ba iohi ia kaei kaba jia bad ki video bala ring na ki CCTV.
