Nongpoh, Lber 26: Ka kynhun Max XXI FC ka la lah ioh ban rah ia ka nam lahduh jong ka lympung ialehkai Women Open to All Knock-Out Tournament bala pynlong daka The Ultimate Legend Bikers Association (TULBA), Eastern Zone.
Kane ka kynhun kala kynjoh ia kane ka thong da ka jinglah ban pynliem ia ka kynhun Lynti Jam da 2-0 kol ha ka jingiakhun phainal kaba long hynnin ka sngi ha ka shnong Umeit, Ri-Bhoi District.
La wan ban pynhap pyrda ia kane ka lympung ialehkai football ki kynthei da u Bah Samborlang Diengdoh, kum u kongsan ha ka jingiadonlang ruh u Bah Nobitson Kharlynnai, u Bah Bandari Ryntathiang bad kiwei kiwei ki riew rangbah nalor ki nongialam ka TULBA.
Ha kane ka phainal, ka jingïakhun, ka long kaba itynnad bad kaba ia khaid bha, hynrei hapdeng ka jingïakhun kaba jur ban ioh rah ïaka nam lahduh, ka Max XXI FC ka la lah ban khyrwit ia 2 kol ban rah ïa ka nam lahduh jong katei ka lympung.
Ki nongialam ka TULBA, Eastern Zone ki la pyntip ba ka jingangnud jong ka kynhun ban pynlong ia kum kine ki jingiakop ialehkai football ne kino kino ki kam ialehkai ka long ban pynsngewthuh paidbah halor ka jingkordor jong ka jingkoit jingkhiah bad ban kiar lailum laiwah na ki jingdih buaid khamtam kum u drok bad ruh ban pynduh jait syndon ia u ne u jingdih ba sniew u ba lah ban pynjot ia ka lawei ki khun samla.
