Nongpoh, Lber 26: Ka Dorbar Shnong Lum Nongthymmai, hynnin ka sngi saitjain kala pynkup burom ia u Bah Sosthenes Sohtun, MLA ba dang shu jop ha kane ka ilekshon ba dang shu dep na Jirang Constituency.
Ia katei ka jingialang pynkup burom la pynlong ha iingdorbar ka shnong Lum Nongthymmai, ha kaba la pynkup burom ia utei u MLA, da ka jingdon baroh ki nongialam shnong, ki longkmie, longkpa bad ki khun samla na katei ka shnong.
Lah ruh ban kdew hangne, ba u Bah Sosthenes Sohtun, u dei na katei hi ka shnong bad uba dei teng ruh u rangbah shnong ka Lum Nongthymmai.
Kiba la sakhi ha katei ka sngi ba pynkup burom ia u Bah Sosthenes Sohtun, ki kynthup ia u Bah Victor Rani, MDC Jirang, u Bah Iaineh Wahlang, Rangbah shnong Lum Nongthymmai lem bad kiwei ki riew rangbah jong katei ka shnong.
