Pyrshah ka KSU ba thmu pynkupbor ka Sorkar ia ka IMA ban pynthied jaka ia ki Nongsengkam ha Jylla

Shillong, Nohprah 12 : Ka Khasi Students’ Union (KSU) ha ka sngi Palei,kala dawa ia ka Sorkar Jylla ban pynsangeh noh ia ka amendment jong ka Meghalaya State Investment Promotion & Facilitation Act, 2024, ban aibor ia ka Investment Meghalaya Agency (IMA) ba kan thied bad ai jaka sha ki nongsengkam sengja namar ka long pyrshah ia ka jingthmu jong ka Meghalaya Land Transfer Act.

Haba kren sha ki lad pathai khubor, u General Secretary ka KSU samla Donald V Thabah ula ong “Ngi kwah ban phah ia ka khubor kaba shai sha ka Sorkar Jylla ba ka dei ban kren shai halor kane bad kumno ba kan pynmyntoi ia ki nongshong shnong ka Jylla. Lada ka Sorkar kam lah ban leh ia kata, ka mut ba kan hap ban pynsangeh ia kane ka Act”.

Ula ong ba ka Sorkar Meghalaya kala pynkylla ia ka Meghalaya State Investment Promotion and Facilitation Act 2024, kaba aibor ia ka Investment Meghalaya Agency (IMA) ban thied jaka bad ai jaka sha ki nongsengkam sengjam lane ki kompani, ka bym shym la shai satia la ki dei kiba na bar Jylla lane kiba napoh ka Jylla.

“Kaei kaba ngi sngewthuh hangne ka long ba kum kane ka amendment kam long satia kaba iaid kat kum ka Meghalaya Land Transfer Act. Ka Meghalaya Land Transfer Act ka don ban iada ia ka hok ki paid riewlum ka Jylla halor ka khyndew ka shyiap. Hynrei haba iadei bad kane ka Act, ka IMA kan thied ia ka jaka bad kan aiti sha ki nongsengkam shimet khlem ka jingiasyllok bad ki Dorbar Shnong ne ka KHADC, JHADC bad JHADC haba ka Jylla ka hap hapoh ka Sixth Schedule” ula ong.

“Namar kata, ngi na ka KSU ngi sngew ba kum kane ka jingpynkylla ia ka Ain (Amendment) kan ktah ia ka bha ka miat jong ki paid riewlum ka Jylla bad kane kan lam ruh sha ka jingknieh ia ki jaka puta jong ki paid riewlum. Nalor kata, ngi lah ban iohi bah aba phi pynmih ia ka ktien “Nongkynshew”, kim shym la pynshai lane kren shai la kine ki nongkynshew ki dei ki paid riewlum ka Jylla lane kin dei ki kompani shimet na shabar ka Jylla. Mynta, lada ki kompani shimet ki wan na shabar ka Jylla bad sdang kynshew kam ha ka Jylla jong ngi, mano ban iohnong na kata?” ula bynrap.

Nalor kane, une u Nongialam ka kSU ula ong ba ka Jylla kam shym la don satia ia ka policy ban pynthikna ba ki samla khlem kam khlem jam, ki samla riewlum ka Jylla kin ioh kam ha kine ki kompani shimet um kum kiwei ki Jylla kum ka Haryana, Andhra Pradesh, Maharashtra bad Jharkhand- kiba la don ia ki policy ha kaba ki komponi shimet ba kynshew kam ha kitei ki jaka kin hap ban pynthikna ba 75% na ki kam dei ban bhah sha ki trai muluk jong ka Jylla.