Shillong, Iaiong 28 : U Superintendent of Police ka East Khasi Hills Bah Vivek Syiem ha ka sngi Nyngkong ula pyntip ba ym shym don satia ki nong Pakistan kiba sah ha Shillong lane ha ka District baroh kawei.
Haba iakren bad ki nongthoh khubor, u Bah Vivek ula ong “Hynrei, ki kam kila iaid shaid shaid ban peit ia ki kot ki sla lada don kiba la wan. Hynrei ia mynta hi, ngi lah khmih bad lap ba ym don satia ki nong Pakistan ha Shillong”.
Ha ka 25 tarik Iaiong, ka Tnad Pulit kala bthah ia baroh ki nong Pakistan lait noh tang kito kiba wan da ka Visa ba bun snem, ki Diplomat bad ki Official Visa, ba ki mih noh napoh u pud ka Ri India ha lane shuwa ka 27 tarik Iaiong.
Ia kane ka jingbthah la pynmih da u Superintendents of Police (SPs) – cum – Foreigners Regional Registration Officer jong ki District bapher bapher ka Jylla kum ka jingpyntreikam ia ka jingbthah ka Ministry of Home Affairs (MHA) ba pynmih ha ka 25 tarik Iaiong.
Ki nong Pakistan kiba wan da ka medical visa la bthah ba kin mih napoh ka Ri ha lane shuwa ka 29 tarik Iaiong bad kito kiba wan da ka SAARC visa la bthah ba kin mih ha lane shuwa ka 26 tarik Iaiong.
Ki bym bud ia kine ki jingbthah kin ngat ha ki jingpynsajia kat kum ki lynti ka ain, ong ki Heh Pulit.
