Shillong, Nailar 26: U Myntri Rangbah ka Jylla u Conrad K Sangma hynne ka sngi Balang ula ong ba ula leit hi dalade ban kyrpad ia u Myntri ka Sorkar Pdeng uba khmih ia ka tnad Civil Aviation ban pyntreikam noh ia ka Baljek Airport bad ong ba kane kan long “kawei ka jingaisngewbha” kaba ka Sorkar Pdeng ka lah ban ai ia ka Meghalaya bad ia kane ka kad liengsuin la buh thong ban pyntreikam noh ha u Nailur jong u snem ban wan.
Haba jubab ia ki jingkylli ha ka iing dorbar halor ka Baljek (Tura) Airport, u Sangma ula ong, ba ka Sorkar kala dep pyllait ia ka T. 85 Klur na ka bynta ki shna pynbha ia ki jingtei hapoh jongka kontrak kaba la iasoi mynshwa bad kan sa pyllait noh shen shisien ba la iasoi ia ka O&M MoU bad ka Airports Authority of India (AAI).
“Kala don ka jingdonkam ia ka T. 85 Klur ban pynbha ia ki jingtei baroh kiba lah don lypa ia kaba ngi lah dep ban bhah. Ka MoU ban aiti ia ka kad liengsuin lah dep ban rai bad shisien ba lah pyndep ia katei ngin sa ai noh ia ka pisa sha ki” ula ong.
Ula ong ba ka AAI kala pan T.2 Klur ha ka shi snem na ka bynta ban pyntreikam. Ngi khmih lynti ba ia ka MoU bad ka jingaiti sha ka AAI ha u Nailur. Naduh katei ka por, sa kumba 8-9 bnai yn sa donkam ban shna pynthymmai biang ia ki jingtei kiba rim bad ban shna pynwandur biang ia ka Runway” ong u Sangma.
U Myntri Rangbah ula ong, ba ki kam kiba iaid ryngkat kila iaid shakhmat ban pynioh ia ka jingpyniasoh lyngba ki liengsuin, da ka jingpyntreikam ia ka liengsuin kaba don 19 tylli ki jaka shong ha ka jingiaid lyngba ka Kolkata bad Shillong.
“Ngi dang khmih bniah ia kitei ki lad ka leit ka wan bad yn trei borbah ban pynlong ia ka kaba seisoh. Katba dang tei ia ki jingtei kiba iadei bad ka Runway, ka jingpynbiang pura ia ka rukom iaid ha ki jaka kan jia noh bad ngi kyrmen ba ia kane yn sa pyndep ha kine ki 9 bnai kiba la dep bad ha u Nailur 2017 ngin lah ban sdang noh ia ka jingpyntreikam” ula ong.
Da kaba pynpaw ba ka Baljek kadei ka projek kaba sngew myllung bha ia nga shimet, ula ong, “Kane kadei kaba u Late PA Sangma ula sdang. Ka long kaba kongsan bha ia nga shimet bad ia ngi baroh. Kila don bun tylli ki jingeh. Ki don bun ki jingtynjuh ia kaba ngi dang trei shitom bha”.
Halor ka jingiakynduh ia u Mynti ka Sorkar Pdeng, u Conrad Sangma ula ong, “Udei u paralok uba iajan bha bad nga, ha ka por kaba lyngkot kaba nga don ha Parliament ia kaba ngi ju ia shong lang. Nga lah ong ia u, ba kane kadei kawei na ki jingai sngewbha kaba phi lah ban ai ia nga, ban pyntreikam ia ka Baljek Airport.”
Ula ong ruh, ba ki kam ha Shillong Airport kila iaid shakhmat bad ka sorkar ka dang iaid ha ka lynti ban pyndep ha ka por kaba la buh.
Ha shwa kane u Symbud Myntri Rangbah ka jylla uba khmih ia ka tnad Transport u Bah Sniawbhalang Dhar ula pyntip ha ka iingdorbar, ba ka AAI ka dang pynkhreh biang ia ka Master Plan ban shna pynheh ia ka Baljek (Tura) Airport ban plie lad ia ki liengsuin ATR-72/Q-400 bad ia ki liengsuin A320.
Haba jubab ia ka jingkylli jong ka MLA ka Ampati ka Miani D Shira halor ka jinglong jingman jong ka jingpynheh, u Bah Dhar ula ong, ba ka AAI kan sa shim ia ka jingiatehkular ban sdang ia ka jingkhmih ia ki jaka da ka LiDAR ban peit bniah ia ki bynta jong ki jingdonkam ia ki kor ki bor bad ia ka jingdonkam pura ia ki jaka katkum ka jingdonkam ha ka jingtyrwa ban shna pynheh.
“Ka Sorkar Meghalaya kala iasoi ia ka O&M MoU ha ka 6 tarik u Jymmang 2026 bad ka AAI bad mynta ki dang iaid shakhmat ban shimkhia ia kane ka kam bad ka AAI ba kan shimti noh, tei pynbha bad bad pyniaid ia kane ka kad liengsuin” ula ong.
Ula bynrap ba shisien ba la dep ban pynthikna pura ia ka Master Plan bad ia ka jingdonkam ia ka jaka da ka AAI, ka Sorkar Jylla kan sa shim ia ki sienjam kiba donkam ban shim ia ki jaka katkum ka jingdonkam ia ka jaka ban pynheh ia kane ka kad liengsuin.
