Shillong, Nailur 28: U Symbud Myntri Rangbah ka jylla Bah Prestone Tynsong u la pynpaw ba ka jylla Meghalaya kan sa kynjoh ia ka 100 % ka literacy rate ne ka jingdon ki nongshongshnong kiba nang ban pule bad thoh hapoh u snem 2028.
Ia kane u Bah Prestone u la pynpaw ha ka jingialang pynkup burom ia ki samla pule ba pass bha, kaba la pynlong da ka Raid Laban Sports, Social & Cultural Organization (RLSSCO) lyngba ka 22nd Meritorious Award for Students, 2025.
Ha kane ka sngi, baroh ki samla pule kiba la shah pynkup burom ki don 444 ngut bad la pynlong ia kane ka jingialang ha U Soso Tham Auditorium, State Central Library, Shillong.
Kum ban shu kdew ba kane kadei ka sien kaba 22, ba ka RLSSCO kala pynkup burom ia ki samla ba pass bha jong ka 19 South Shillong hapoh ka jingialam u MLA Bah Sanbor Shullai uba dei ruh u Myntri Sorkar.
Kine ki 444 ngut ki samla kiba ioh pdiang ia ki khusnam ki kynthup naduh ki samla pule SSLC, HSSLC bad kiwei de ki kyrdan pule.Na ka liang ka RLSSCO haba pynkup burom kala jied ruh iaki khynnah kiba wan na ki long iing baduk ne BPL bad kiwei kiwe de.
Ia ki Topper, ka RLSSCO kala pynkup burom da ki Laptop bad kiwei kiwei de ki jingai sngewbha katba ia kiwei pat la ai da ki jingai sngewbha ki momento bad kiwei kiwei ki tiar sah kynmaw.
Haba kren kum u kongsan u Symbud Myntri Rangbah ka jylla Bah Prestone Tynsong u la pynpaw ba u dap da ka jingkyndit mar sien rung hadien ba u iohi ia ka jinglah ban pynlong ia kane ka programme kaba jop bad ka burom ia kane baroh ka leit sha u Bah Sanbor.
“Ka jingioh rung u Bah Sanbor Shullai hapoh ka kynhun Myntri Sorkar (MDA II) kala dei hok namar ba ym shym la shakri tang ia ka 19 South Shillong hynrei u la shakri ruh ia ka jylla hi baroh kawei” ong u Bah Prestone.
Shuh shuh u Bah Prestone u la ong, “Kane ka sienjam ba la shim da u Bah Sanbor kala kyntiew shisha ia ka 19 South Shillong.Nga ialade ngam tip eiei ia kaei kaba long ba man hala ka constituency, kumta la dei eh ia nga ban bud ia ki dienjat jong u Bah Sanbor”.
U Bah Prestone ula ong, da kine ki jingai mynsiem ia ki samla pule hapoh ka jylla, ha u snem 2028 ka jylla kan sa kot 100 percent ha ka literacy rate.
Ha kajuh ka por u Bah Prestone u la iaroh ia kane ka sienjam jong u Bah Sanbor, ha kaba u la kyntu ruh ia ki kmie ki kpa ba kim dei ban bynshet sha kiwei ia ka jingbah khlieh na ka bynta ki khun ki kti ha ka liang ka pule puthi.
Kumta u la kyntu lang ia baroh ba kidei ban don ka jingkit khlieh na ka bynta ban kyntiew ia ka jylla Meghalaya, hynrei u la pynpaw ruh iaka jingbynniaw halor ka jingdon jong ki nongwoh nia ia kaei ba ka sorkar ka leh ban kyntiew iaka jylla.
Na ka liang u Bah Sanbor Shullai haba kren u la pynpaw ba kane ka dei ka sien kaba 22 kynthih ba u la pynlong ia kum kane ka program ban pynshlur ia ki khun samla jong ka constituency bad ha kajuh ka por u la kyntu ruh ia baroh ki samla pule ba kidei ban kiar lai lum lai wah na u drug, khnang ban lait na kiei kiei baroh.
Nalor ki Principal, ki nonghikai bapher bapher jong ki skul kiba don hapoh ka Constituency, la wan ban ia don lang ruh da ki Rangbah Shnong na ki shnong bapher bapher bapher ha ryngkat lang ka jingsakhi lang ki kmie ki kpa jong ki samla ba shah pynkup burom.
