SHILLONG, Nailur 22: U Myntri Kam Pohïing ka jylla u Bah Lahkmen Rymbui hynne ka sngi ula iathuh ba shen ka sorkar kan sa pynbna noh iaka Resol thep kam pulit hapoh ka jylla bad ka daw jong ka jingslem ban pynbna iaka resol kadei namar ba hap ban pyndep ia ki kam ki jam kiba iadei bad ka Roster System.
U Bah Rymui u la ong, ba ka tnad pulit ka dang pynkhreh iaka resol bad kam shim la shongthait bad tang shu dep pynbiang ia ki kam ki jam kiba iadei bad ka Roster System kan sa pynbna noh ia katei ka resol.
“Ngi kwah ban thungkam noh ha ki kam kiba lait haka tnad pulit namar ka long kaba kongsan bha naka bynta ban ai ka jingshngain bad jingiada ia ki paidbah ka jylla” ong u Bah Rymbui.
U la ong, ka tnad pulit kala khmih bniah ha kaba iadei bad ka Roster System, bad kadei ka kam kaba khraw bad kaba sngewtynnad mynta ka long, ba ki lah jan pyndep lut ia ka kam nadong shadong bad kin sa aiti shaka sorkar bad lada baroh ki long kiba iaid beit iaid ryntih yn sa pynbna noh shen iaka resol.
U la iathuh ba ka jingkhot thep kam pulit kala sdang naduh 2019 hynrei kim shym la lah ban iaid shakhmat namar ka jingwan saphriang ka khlam COVID-19 bad ym shim la lah ban leh iaka Physical Test bad iaka jingthoh eksamin hynrei la hap ban pyndep noh ia kitei hadien.
U Bah Rymbui u la iathuh ba ka tnad pulit kala pynkhreh ban pynmih noh iaka resol hynrei ka iingkashari kala pynmih iaka hukum ban pyntreikam iaka Roster System, kumta ka sorkar ka hap ban peit bniah khnang ba lada pynmih iaka resol kan long kaba iaid katkum ka aiñ.
