Guwahati, Naitung 11 :Ha ka por ba ka sorkar pdeng ka la ngat ha ki jingiakhih ba jur bad ki jingpynpaw pyrshah ia ka skhim ‘Agnipath’ ki tnat shipai ki la sdang ban poi sha ki samla ban pynshai ha ka ba iadei bad kane ka skhim ha ka thain shatei lammihngi (Northeast) hapoh ka jingialam jong ka tnat shipai Assam Rifles ki ba la ai ka jingpynshai sha ki samla ha ki thain nongkyndong ki ba pajih bad ki ba marjan bad ka Myanmar hapoh Arunachal Pradesh, Nagaland bad Manipur.
Ia kine ki jingpynshai paidbah lyngba ka tnat shipai ryngkew (Army) bad ka Assam Rifles la pynlong ha kito ki jaka ki ba la shah ktah jur ha ki kam lehnoh bad ki ba don hajan ki thain khappud ki ba don ia ki jaka rung jaka mih bad ki ri ba marjan.
Kane ka jingialap ha kine ki jaka ba jur ki kam lehnoh la sdang na Tirap district ka Arunachal Pradesh bad Koklak district ka Nagaland, baroh ki dei ki jaka ki ba pajih bad ki ba don ia ki kynhun seng lehnoh Naga ki ba don ruh ia ki jaka rung jaka mih ba la pyndonkam da kiwei pat ki kynhun seng lehnoh ka thain, kum ka ULFA(I) na ka bynta ban leit sha ki ktem ki jong ki shapoh Myanmar.
Mynta ka sngi, ka Shamator Noklak Battalion jong ka Assam Rifles ka la ialap halor kane ka skhim na ka bynta ki shipai ia ki ba yn ithuh kum ki ‘Agnipath’ kum ka lad ban ioh rung hapoh ki tnat shipai hapoh ka shnong Chokla ka ba hapoh Noklak district ka Nagaland. Ki nongwan iashim bynta kim shym la dei tang ki samla shnong, hynrei ruh ki nongialam shnong bad ki ba la san kumjuh.
Kane ka jingpynshai ka kynthup halor ka jinglah, ki jingsiew bad kiwei pat ki jingmyntoi nalor ka por jong ka jingshakri hapoh ka tnat shipai. Ha ka 8 bad 9 tarik mynta u bnai ka Khonsa Battalion jong ka tnat shipai Assam Rifles ka la pynlong ia ka jingpynshai paidbah hapdeng ki samla bad ki khynnah pule ha ka ba iadei bad ka skhim ‘Agnipath’ na ka bynta ban ioh rung ha ki tnat shipai jong ka India hapoh ka shnong Lapnan ka ba hapoh Tirap District.
Na ka liang ki samla ki la ioh mynsiem shibun bad pynpaw ia ka jingangnud ban shim ia kane ka sienjam ban ioh rung sha ki tnat shipai. Ia ki kot lyngkdop ki ba iadei bad kane ka skhim la sam ruh da ki shipai Assam Rifles sha kine ki samla.
Ia kane ka jingpynshai halor kane ka skhim la pynlong ha ka jingrakhe ia ka ia ka lyngkhuh snem ka ba 36 jong ka seng ki samla bala tip kum ka Lapnan Youth association’ jong ka shnong Lapnan. Ka jingrakhe ia kane ka sngi ka kynthup ruh lyngba ka jingpynlong ia ki prokram ki ba iadei bad ka kolshor, ki jingshad tynrai bad ki jingtem jingput na ki samla jong ka shnong.Ha kane ka prokram la sakhi ruh ia palat 400 ngut ki nongshong shnong ki ba la ai ka jingkhublei na ka bynta ka tnat shipai Assam Rifles ki ba la wan pyniasoh lang bad ki ha kane ka jingrakhe ka ba jop.
