Shillong, Naitung 11 : Ka Shillong Lajong watla ka hap ban ialehkai tang 10 ngut ruh hynrei ka la ioh pat ban mad ia ka jingjop kaba nyngkong da 2-1 kol ha ka jingiakhun pyrshah ia ka Mawkhar ha ka lympung Shillong Premier League kaba long ha madan Third Ground, Polo ha kane janmiet sngi Nyngkong.
Shwa kane, kitei ki arliang mamla ki la ioh ban khur mar shi point na ki saw tylli ki jingiakhun hynrei dei ka Lajong kaba wan kham shakhmat namar ka iapher ha ka jingioh thep kol.
Haba phai sha ka jingiakhun ha katei ka sngi dei u Wadajied Ryngkhlem u ba ioh ban thep ia ka kol kaba nyngkong na bynta ka Lajong ha ka minit kaba 28 katba u Aman Ahlawat pat u la thep ia ka kol kaba ar ha ka minit kaba 34 na ka bynta ka kynhun ban ioh lamkhmat da 2-0 kol tang ha ka kylla step.
Ia ka shi kol jong ka Mawkhar pat ha kane ka sngi la ioh ban thep da u Balajied Syiemlieh ha ka minit ba khatduh jong ka kylla miet lyngba ka penalty.
Da katei ka jingjop ka Lajong ka la lait mynta na u lain jingmynsaw namar ka la iakhaid mynta bad ka Malki mar saw point.
Ka jingiakhun ha kane ka sngi Baar pat kan long hapdeng ka Nangkiew Irat pyrshah ia ka Rangdajied United Fc ha ka por 4baje janmiet.
