Nongpoh, Lber 01: Ki dkhot jong ka District Selection Committee, Ri-Bhoi District hynne ka sngi Thohdieng, kila pynshai paidbah halor ka jingslem ban pynlait ïa ka Result DSC jong ki post bapher bapher wat hadien bala dep ban pynlong ïaka eksam thungkam ha u snem 2021-22.
Haba kren sha ki lad pathai khubor na ka liang u Bah WS Ryntathiang Vice Chairman ka DSC ula ong ba ïa ka jingpynbna ne Advertisement halor ki post bapher bapher jong ka DSC la pynbna ha u snem 2020 hynrei namar ka jingwan lyngshop jong ka khlam COVID-19 la lah ban pynlong ïa ka eksam thungkam haduh u snem 2021 bad 2022 bad tang hadien ba ki samla wadkam kila dep ban thoh eksam kala mih sa kawei ka Court Order bala bthah ba dei ban pyntreikam ïaka Roster System.
Ula ong ruh ba hadien ka jingmih katei ka order la hap ban pynsangeh biang namar ka DSC kam don bor ban shna ïaki Roster hynrei ki tnad sorkar kiba dei ban leh ïa katei ka kam bala bthah ruh ïaki hadien bala dep pynlong da ka jingïakynduh (meeting) bad kumjuh ruh ki jinghikai (training) kumno ban pynkhreh lane ban shna ïaka Roster, hynrei haduh mynta ym pat don kawei ruh ka tnad sorkar kaba la dep ban pynkhreh ïa ka Roster.
U Ryntathiang ula ong ruh ba na ka liang ka DSC kam shym la shongthait ha kaba ïadei bad ka Result DSC bad kala phah ruh da ki jingpynkynmaw la kumba 4 sien sha ki tnad sorkar bapher bapher hynrei haduh mynta ym pat ioh pdiang wat tang kawei ruh kaba dei ka daw ka jingpynslem ban pynmih ïaka Result DSC.
Ula ong, ba lada ki tnad sorkar kila dep ban pynkhreh pynkhrum bad ban pynbiang ïaka Roster kam don jingeh ban pynmih kloi ïaka Result, ha kaba u la kyntu ruh ïaki tnad sorkar kiba don kumba 24 tylli ba kin pynkhreh bad ban pynbiang noh ïaka Roster khnang ba yn lah ban pynmih kloi ïaka Result bad lada ki don kano kano ka jingeh ki lah ruh ban leit mih sha DSC na ka bynta ki jingïarap.
