Tura, June 2: Bun tylli ki sengbhalang na rilum Garo kila rai ban pynsangeh shwa iaka jingialang bad ka Rally halor ka Roster System bad Reservation Policy bala buh ban long lashai ka sngi Saitjain ha Tura namar ka jingkhot u Myntri Rangbah ka jylla Conrad K Sangma sha ka jingialang ban iathir ia kine ki mat.
Katei ka jingialang kaba thmu pynlong da ki sengbhalang kadei halor ka jingsngewkhia ka jongki ha kaba iadei bad ka Roster System bad ka Job Reservation Policy bad mynta kila pynkynriah noh shwa ia kane ka jingialang paidbah.
Ki sengbhalang kiba paw kiba kynthup iaka Garo Students’ Union (GSU), Association for Democracy and Empowerment (ADE), Achik Youth Welfare Organization (AYWO), A’chik Students’ Welfare Association (ASWA), FAF, Federation of Khasi Jaintia and Garo People (FKJGP), Achik Conscious Holistically Integrated Krima (ACHIK), GHULU, Garo Farmers Union (GFU), AIGU, GSMC bad A’chik Holistic Awakening Movement (AHAM) kidei kiban leit iashimbynta ha ka jingialang kaba la khot da u Myntri Rangbah ka jylla.
Ka jingshim rai kine ki sengbhalang ban pynkynriah noh shwa iaka jingialang paidbah kadei hadien ba kila iatai sani bha hapdeng ki para nongialam, kiba ngeit skhem ba kan long kaba don jingmyntoi bha lada iakren bad iatai sani shwa bad u Myntri Rangbah ka jylla.
“Ngi kum ki nongialam jong ki sengbhalang, ngi la rai ban buh hakhmat shwa iaka jingiakren bad jingiatai bad u Myntri Rangbah ka jylla hashwa ba ngin leit ban pynlong iaka jingialang paidbah” ong u Pritam Arengh, President jongka FKJGP na rilum Garo.
U Conrad K. Sangma yn lum ia ka jingialang bad bun tylli ki sengbhalang na rilum Garo ha ka sngi Saitjain ha nongbah Tura ban iakren halor ka Roster System bad Job Reservation Policy.
Kane ka jingialang kan long ha ka por 11.30 mynstep ha Tura Circuit House.
