Shillong, Risaw 30 : Ka Sorkar Jylla kala bthah ia ka Khasi Hills Autonomous District Council (KHADC) ban weng noh mardor ia ka muhor (seal) ba khang ia ka Lower Terminal Point ka Shillong Ropeway project ha Madan Laban bad ban aiti ia baroh ki tiar jong ka project bala kurup, haba maham ba kan shim ia ka lynti jong ka ain lada ka Council kam kohnguh.
Ha ka shithi kaba la thoh da ki kyntien kiba tyngeh sha u Secretary ka Executive Committee ka Council ha ka sngi Thohdieng, ka Tnad Tourism kala ong ba ka Enforcement Wing jong ka Council kala khang ia kane ka jaka ba pyntrei ia ka project ha ka 27 tarik Risaw bad beh lut ia baroh ki nongtrei ka project.
“Ha ka 27 tarik Risaw, 2026, hapdeng ka por 10:30 baje mynstep haduh 12 baje shiteng sngi, ki Ophisar ka Enforcement Wing jong ka KHADC ba ialam da u Bah Kordor Synrem, Inspector, kila wan rung hapoh ka jaka jong ka Lower Terminal Point ha Madan Laban. Kila beh ia ki nongtrei ka project, khang tala bad tah muhor ia ki jingkhang jong ka Ophis ba buh ha kane ka jaka, lum thup ia ki tiar ba kurup, bad shim ia ka zima-namas na ki site manager jong ka M/s KEC-TCL (JV)” ong ka shithi.
Ka Tnad Tourism ka ong ba ka KHADC kala shim ia kane ka sienjam hapoh ka kyndon 7A jong ka United Khasi-Jaintia Hills District (Trading by Non-Tribals) Regulation, 1954, ba kynnoh pynkhein ia ka kyndon 3.
Ka Sorkar ka ong ba kane ka project ka dei ka jingtei paidbah jong ka Sorkar Jylla, kaba la pyntrei da ka Meghalaya Ropeway Development Authority kum ka nodal agency hapoh ka Meghalaya Ropeway Act, 2022.
Ka ong ba ka Tnad kala ioh ia ka forest clearance ban pyntrei ia ka project.
“Ka jingmynjur ia ka Stage-II (final) ban pyndonkam ia ka jaka ba 2.3257 hectare ka jaka khlaw ha Riat Laban Reserve Forest bad Riat Laban Forest na ka bynta ka project lah ai da ka Ministry of Environment, Forest and Climate Change da ka shithi ba 24.10.2024. Ka M/s KEC-TCL (JV) kala pyntrei ia ka kam hapoh ka jingai bor ka nongaikam” ong ka shithi.
Halor ka Trading Licence, ka Sorkar ka ong ba ka contractor kala aplai ia ka licence shuwa ban pyntrei ia ka kam. “ Ka M/s KEC-TCL (JV) ka dei ka contractor bala thung da ka Tnad Tourism, kaba la aplai ia ka tracding licence ha ka 18.05.2026 hadien ba ioh ia ka NoC na ka Riat Laban Dorbar Pyllun. Ka jingai ia ka Trading Licence ka dang sahteng bad ka KHADC” kala ong.
Ka Sorkar kala pynksan ba ka jingpynkhreh ban pyntrei ia ki kam kam mut satia ia ka jingkhaii. “Hapoh ka kyndon 30(2) jong ka Meghalaya Ropeway Act, 2022, kaba ailad ia ki promoter ban pynkhreh lypa ia ki kam ki jam, kynthup ka jingai tender bad ka jingthung ia ki contractor hynrei ki dei ban ioh ia ka licence hapoh ka kyndon hashuwa ban pynsdang ia ka jingtrei. Ki jingpynkhreh ia ki kam kumba la kdew haneng kam dei ka kam khaii, kumta, ka jingdon ia ka Trading Licence ha kane ka khep kam mih satia” kala ong.
“Nalor kane, ka jaka ba pynkhreh ia ka jingtreikam ka dei kaba la leh ha ka jaka kaba dei jong ka Sorkar Jylla” ong ka shithi.
Ka Sorkar kala bthah ia ka KHADC ban weng mardor ia ka tala bad ka muhor, weng noh ia ka jingkurup bad ka zima namas bad pynlait noh ia ki tiar kiba kurup, bad ban pynthikna da ka jingthmu ba kam dei ban leh eiei shuh pyrshha ia ka Sorkar Jylla, ia ka bor ba dei khmih lane ka agency ba pyntrei ia ka kam.
Haba maham ia kaei ka ban jia, ka shithi ka ong “Lada ia katei haneng ym leh noh mardor, ka Sorkar kam banse ban shim ia kum kine ki sienjam kiba lah ban leh ha ka ain, lyngba ki bor ba dei khmih, ban weng ia ka jingpynwit bad shimti biang ia ka jaka bad ki kam ka project. Phin hap shim ia ka jingkitkhlieh ia kano kano kaba jia, kynthup ka jinglut jingsep bad ka jingpynslem ia ka project”.
