Shillong, Risaw 30: Ka Sorkar Meghalaya kala pynbeit ne buh ia ka por ba 45 sngi ban ai ia ka Transit Permit na ka bynta ki masi bad kiwei ki jingri jingdup kiba la wanrah shapoh ka Jylla na kiwei pat ki Jylla.
Ia kane ka rai la pynmih da ka Personnel and Administrative Reforms (B) Department lyngba ka hukum kaba la pynmih da u Commissioner and Secretary u Bah C.V.D. Diengdoh. Ia kane ka jingpynbna paitbah la pynkylla thymmai noh na ka jingpynbna kaba la dep pynmih ha ka 17 tarik u Lber 2026.
Hapoh jong kane ka jingpynkylla ia ka kyndon, ka jingai jingshakri kaba la tip “Issue of Transit Permit for Bovine Animal and other Livestock transport from outside the State” dei ban pyndep hapoh ka 45 sngi jong ki sngi treikam hadien ba la ioh pdiang ia ka aplikeshon.
U Secretary jong ka Tnad Animal Husbandry and Veterinary ula shah thung kum u Ophisar uban khmih ha kaban ai ia ki Permit.
Kino kino kiba phah ia ki aplikeshon ban kyrpad ne pynpaw ia kino kino ki mat ha kaba iadei bad ka jingpan ia ka Transit Permit ki lah ban leit mih sha u Principal Secretary ne u Commissioner and Secretary ka Tnad Animal Husbandry and Veterinary, kiba la shah pynkhamti ia ka kamram kum ki bor kiba dei khmih.
