Shillong Jylliew 02: Ka Executive Committee jongka Khasi Hills Autonomous District Council (KHADC) kala bthah ia baroh ki bor treikam ba kim dei ban pdiang ia ka jingpynkylla jait/Kur sha kano kano ka jait Khasi/kur da kino kino ki briew khlem da ioh ia ka jingbit da ka jingthoh n aka Registration Authority ka Council ne ka Executive Committee.
Kat kum ka jingpynbna bala pynmih da ka KHADC ha ka sngi Palei la ong “Ka EC ka kwah ban bthah ia baroh ki bor treikam kiba don hapoh u pud u sam ka KHADC ba kim dei ban pdiang ia ka jingpynkylla jait/kur sha kino kino ki jait Khasi/kur da ki briew khlem da ioh ia ka jingbit da ka jingthoh n aka Registration Authority ne EC ka Council”.
Kane ka jingpynbna kala mih hadien b aka Executive Committee ka Council kala ioh jingtip ba ki don bun ki briew kila pynkylla ia ka jait jong ki/kur bad shim ia ka Jait Khasi/Kur da kaba shu leh declaration/affidavit.
“Ka section 12 jongka Khasi Hills Autonomous District (Khasi Social Custom of Lineage) Act 1997 kala mana jur ban pynkylla iaka Jait ne Kur ne ban shim ia kano kano ka Jait ne Kur Khasi khlem da ioh iaka jingbit da ka jingthoh na ka Registration Authority bad ka Executive Committee, jongka Khasi Hills Autonomous District Council” kala ong.
Namar kata, ka Executive Committee ka pyntip sha ki paidbah ba ym lah mano manor uh ban pynkylla ia ka jait/kur lane shim ia ka Jait/kur Khasi khlem da ioh jingbit da ka jingthoh n aka Registration Authority bad ka EC ka KHADC kat kum ki kyndon jong ka KHAD (Khasi Social Custom of Lineage) Act 1997.
