Shillong, Jylliew 04 : Ka Voice of the People Party ka pynrem jur ia ka rai jong ka sorkar MDA ban pyniaid da u odd/even ia ki kali kamai kiba rung sha Police Bazar bad Iewduh kum ka lad ban pynduna ia ka jingdheng kali.
“Kane ka jingleh ka sorkar ka long ka jingniewbein bad lehbein ia ki baduk ha ka imlang ka sahlang kiba hap ban shaniah ha ki kali kamai kum ka lad ban kamai jakpoh bad ban poi sha ki jingleit jong ki” ong u Nongaiktien ka VPP Dr B Myrboh ha ka kyrwoh.
“Ka long ka bym lah ban pdiang ia kum ka jingleh kane ka sorkar ban kynnoh ia ki baduk ba ki dei ka daw jong ka jingeh jong ka jingdheng kali ha ka nongbah Shillong. Ha ka jingshisha ka sorkar ka la dei ban tehlakam ia ka jingpyndonkam palat ia ki kali shimet ha ka nongbah Shillong bad ban pynshlur ia ki kali kamai. Hynrei kane ka Sorkar ka shim pynban ia ki rai khongpong ba ktah ia ka kamai kajih” ula bynrap.
Une u Nongialam ka VPP ula ong “Ngi tip baroh ba ka jingwan jong ki kali na kiwei pat ki jylla kadei ka dawbah ba wanrah ia ka jingkhapngiah ha ki thain Police Bazar bad Iewduh. Ngi dei ban kynmaw ba kine ki kali bar jylla ki wallam tang khyndiat ka jingiohnong sha ka pla tyngka jong ka Sorkar”.
Ula ong kane ka sorkar kam nud ban shim ia ka rai ban wanrah ia ka jingbha ia ka imlang sahlang lada ka ktah ia ki heh ki hain (high level) hynrei kam salia ban shu shim ki rai khlem kynjoh ktien na kito kiba shah ktah pat na ka rai jong ka sorkar lada ki dei ki barit baria. Ki khun samla ha ka jylla kin dangtrei aiu shuh? La buh jingkylli ka VPP.
U Dr Myrboh ula ong kadei ka kamram jong ka sorkar ban pynthikna ba kan don ka jaka ieng kali ba thikna ia ki kali kamai ban pynhiar bad pynkiew ia ki nongleit nongwan na ka bynta ka jingbiang lang jong kiba bun.
Ka Party ka dawa ia ka Sorkar ba ka dei ban weng mardor ia kane ka ain iakjakor kaba ktah ia ki paidbah.
