Shillong, Naiwieng 22 : Ka North East Students’ Organisation (NESO) kala pynrem jur ia ka jingther kuli ki Pulit Assam ha Mukroh, West Jaintia Hills hynne ka step haba dawa ruh ia baroh ki Sorkar jong ki Jylla Shatei Lam Mihngi ka Ri ba kin kut jingmut shisha ha kaban pynbeit noh ia ki jingiakajia pud hapdeng jong ki.
Ha ka kyrwoh, u Chairman ka NESO bad Samuel B Jyrwa ula ong ba ka NESO ka sngewsih kthang halor kane ka jingjia ha khappud ka Meghalaya bad Assam ha West Jaintia Hills bad West Karbi Anglong kaba la shim jyndat haduh 5 ngut ki briew bad pynmynsaw ia bun ngut na ka jingther kuli ki Pulit Assam.
Une u Nongialam ka NESO ula ong ba ka jingiakynad kaba mih ha khappud jong kine ki artylli ki Jylla kala pynkhynniuh ha baroh kawei ka thain namar ki khubor na ka jaka ba jia, kala saphriang kum ka ding.
Haba pynpaw ba ka jinglong synjor ka jinglong jingman ha khappud Assam-Meghalaya ka pynkynmaw ba haduh katno ki paidbah ki shongsyier haba mih kum kine ki jingiakynad, u Bah Samuel ula ong ba ki jingjia jong ki snem bala lah ha khappud ka Assam-Mizoram, Assam-Nagaland, Assam-Arunachal Pradesh ruh ka pyni ia ka jingjynjar bad jingsohsat ka jingim jong ki briew ba sah ha khappud.
U Bah Samuel ula ong ba haduh katno tylli ki mynsiem kila duh na Meghalaya ha u snem 2010 haba mih ka jingiakynad pud hapdeng ka Meghalaya bad Assam bad watla ki Sorkar Assam bad Meghalaya ki dang iakren pynbeit khappud, ka jinglong jingman kam long shngain satia ha ki jaka khappud ka Assam-Meghalaya.
“Ngi sngewthuh ba ka jingiakajia pud ka iapher na kawei ka jaka sha kawei pat hynrei, ka NESO sa shisien ka dawa ia baroh ki Sorkar Jylla ba kin kut jingmut shisha noh ha kaban pynbeit iakane ka jingeh kaba la slem bah bad lada donkam, ka sorkar Pdeng ka dei ban long ka liang manla ha ki jingiakren bad ka NESO ruh kan iai bteng ban pynshlur ia ki paidbah ha khappud ba kin tei ia ka jingiadei hapdeng jong ki” ong u Chairman ka NESO.
Ha kajuh ka por, ka NESO kala khot la wer ia baroh ki paid riewlum ba kane ka kam kam dei satia kam iapher jaidbynriew hynrei ka dei ka jingiakajia pud ha kaba ka deika kamram jong ki Sorkar Jylla ba kin iapynbeit ia ka.
Na ka liang ka NESO kala phah ia ka jingsngewlem sha ki bahaiing hasem jong ki lanot kiba iap na kane ka jingjia ha Mukroh.
