Shillong, Naiwieng 22 : Ka United Democratic Party (UDP) hynne ka sngi ba-ar kala dawa ia ka Sorkar Jylla ban thung da ka jingtohkit jong ka National Investigation Agency (NIA) halor ka jingshah siat iap ki riew paidbah ha ki Pulit Assam ha shnong Mukroh, West Jaintia Hills, kaba shim jyndat haduh 5 ngut ki mynsiem briew.
Ka UDP kala pynkynriah noh ruh ia ka rai ban pynbna ia ka thup kyrteng ba nyngkong jong ki kyrtong ki ban mih aireng ha ka elekshon MLA 2023, kum ka dak ka jingsngewsih bad jingsngewlem ia ki bahaiing hasem jong kine ki lanot.
Haba niew ia kane ka jingleh ka Assam kum ka kam riewkhlaw, u President ka UDP Bah Metbah Lyngdoh ula ong “Ngi pynrem jur bad dawa ia ka Sorkar khamtam ia u Myntri Rangbah ka Jylla ban shim ia ka sienjam ba tyngeh bad ban thung ruh ia ka jingtohkit jong ka NIA halor kane ka jingjia”.
U Bah Metbah ula ong ruh baka UDP kan dang ap ia ki jingtip ba bniah halor kane ka jingjia khnang ba kan shim ia ka rai ba khatduh halor kane ka kam.
Hadien ba pyniaid ia ka jingialang jong ka State Election Committee (SEC) u Bah Metbah ula ong ba namar kane ka jingjia ba sngewsih, ka Party kala rai ban pynkynriah shuwa ia ka jingpynbna paidbah ia ka thup kyrteng ba nyngkong jong ki kyrtong.
“Kum ka party, ngi la rai ba kan bha shibun ia ngi ban pynkynriah shuwa ia ka jingpynbna. Sngewbha iai shah bad ngi naba ngi kwah ban isnohkti lang bad ki bahaiing hasem jong kito kiba la duh noh iala ki baieid bathoin na kane ka jingjia ba hynne ka step” ula ong.
Ula pyntip ba san ngut ki briew kila iap na Meghalaya bad uwei na Assam ha kane ka jingjia ther kuli ki Pulit. Ula ong ba ki UDP kan sa shim shuh shuh ia ka rai halor kane ka jingjia hadien ba u Myntri kam Pohiing ma Lahkmen Rymbui ula iakynduh ia ki Nongialam jong ka Party.
Ha kajuh ka por, ka UDP kala pynlong ruh ia ka jingiasngap jar ba arminit kum ka dak ka jingburom ia kine ki mynsiem bala khlad noh.
