Shillong, Jylliew 23: Ki Nongshongshnong ka Langpih bad ki 38 tylli ki Shnong ba marjan jong ka West Khasi Hills District, kila pynphai noh ia ki Electoral Photo Identity Card (EPIC) bala ai da ka Sorkar Assam kum ka dak ban pynpaw ba ki kwah ban long noh shirta ki nong Meghalaya.
Ha ka dorkhas bala iasoi lang da ki Khlieh Nongsynshar ka Hima, ki Rangbah Shnong bad ki Secretary Shnong jong kine ki 39 tylli ki Shnong, kaba la aiti sha u Symbud Myntri Rangbah ka Jylla Bah Prestone Tynsong hynne ka sngi palei, kala kyntu ia ka Sorkar Jylla ba kan pynhap noh ia kine ki shnong sha Meghalaya ha ka jingiakren pynbeit pud jong ka kylla ba-ar (Phase-II) hapdeng ki Myntri Rangbah ki ar Jylla ka ban sa long noh shen.
Ia kane ka kynhun ki Khlieh Nongsynshar la ialam da u MDP ka NPP na Rambrai-Jyrngam Bah Bajop Pynrope.
Haba iakren bad ki nongthoh khubor, u Bah Bajop ula ong “Ki 39 shnong lyngba ki Rangbah Shnong bad Secretary Shnong kila iasoi ia ka dorkhas ba pynpaw ia ka jingkwah ban hap ha Meghalaya bad ia kane ka dorkhas la aiti ha u Symbud Myntri Rangbah ka Jylla”.
Une u MDC ula ong ba ka rai bala shim da kine ki 39 tylli ki Shnong kiba hap hapoh ka thain Langpih, kan nang pynsuk ia ki Regional Committee na Meghalaya bad Assam ban shim ia ka rai halor kane ka kam ha ka por ba ki leit ban jurip bad sorjamin ia ki jaka ha khappud.
La pyntip ba napdeng kine ki 39 tylli ki Shnong, haduh 20 tylli ki dei ki shnong ba shong ba sah ki Khasi bad 19 tylli ki dei kiba shong bas ah da ki paid Garo.
“95% na ki nongshongshnong kila dep shim rai da kawei ka sur ba ki kwah ban hap sha Meghalaya” ula ong haba bynrap “hooid, ngi dang pyrshang ban tan lang ia kiba sah kiba long sa 5% eiei. Ka Hima kan sa leh ia ka homework kumno ban pynkohnguh ia kine ki 5% ha ka por ba ki Regional Committee ki leit ban sor jamin bad ban pynthikna ruh ba kin kyrshan ia ka rai ban hap beit sha Meghalaya”.
Haba kubur ba ki arngut ki Myntri Rangbah kim pat shim rai satia lano ban pynsdang ia ka kylla ba-ar ban iakren pynbeit pud, une u MDC ula ong “Shuwa ba ngin leit sha ka thma, ngi hap ban pynbiang ia ki tiar ialeh bad ngi dei ban long kiba la pynkhreh. Ngim kwah ban shu shim rai muk mak, hak dak bad kane hi ka dei ka daw ba ngi wan shane mynta ka sngi”.
“Ngi kwah ban pynkhreh bha ialade khnang ba ynda ki Regional Committee kila sdang ia ka kam, kiei kiei kin iaid beit iaid ryntih bad kin long kumba kwah u paidbah” ula bynrap.
Haba kylli, u Bah Bajop ula ong ba bun na ki Nongshongshnong jong ki 39 tylli ki Shnong kila dep ban pynphai noh ia ki EPIC bala ai da ka Sorkar Assam.
“Ka dei ka jingshisha ba baroh artylli ki Jylla kila ai skhim bad ai ruh sha ki ia ki EPIC mynta la bun bun snem. Nga da kmen shisha ba bun na ki nongshongshong jong ki 39 tylli ki Shnong kila dep pynphai ia ka EPIC jong ka Assam khnang ba kan pynsuk ia ki Regional Committee ba kan pynbeit ia ka jingiakajia pud ha kane ka thain” ula ong.
Nalor kane, une u MDC ka Rambrai-Jyrngam ula kyntu ia ki paidbah ba kin ieng skhem bad iatylli halor ka nongrim ba kila shim ban pynthikna ba kan nym mih satia ka kynrum kynram hadien ba la iasoi ia ka soskular hapdeng kine ki artylli ki Jylla.
“Ngi la iohi ia kaei kaba jia ha ka jingiapynbeit pud jong ka kylla kaba nyngkong. Balei kane ka wan jia, ka daw hi ka dei namar ki don katto katne ki briew ha ka por ba leit jurip ki Regional Committee kila ieng ba ki kwah ban leit sha Assam hynrei hadien pat ki kwah ban wan sha Meghalaya” ula ong.
“Ta ka daw nga sngew baka jingiakren jong ka kylla ba-ar kam dei shuh ban don ka jing bym iasngewthuh jingmut khnang ba kan nym buh jingeh ia ki artylli ki Jylla ba kin shim ia ka rai. Ka jingkyntu jong nga hi ka long ba ki paidbah ha khappud ki dei ban sngewthuh bad ban iatylli ha kawei ka sur” ula bynrap.
Kat kum ka jingong jong u,mynta ka dei ka kamram jong ki Hima ban pynthikna ba 100 na ki 100 ki nongshongshnong ha kine ki 39 tylli ki Shnong kin kyrshan ia ka rai ban hap sha Meghalaya.
