Tura, Iaiong 06: Ka Internal Quality Assurance Cell jong ka Don Bosco College, Tura bad ka North East Hill University (NEHU) Shillong hynne ka sngi Saitjaiñ kila pynlong ia ka jngialang bad ki Principal bad ki NEP/IQAC Co-ordinators na ka bynta ki College kiba don ha rilum Garo kiba pyniasoh bad ka NEHU.
Kane ka Conference kaba shi sngi halor ka mat “Higher Education in Meghalaya and implementation of NEP in the colleges of Garo Hills” la pynlong ha Don Bosco College of Teacher Education Hall, ia kaba la wan ban iashimbynta da ki Principal, ki dkhot ka NEP/IQAC na ki College bapher jongka rilum Garo.
Haba kren ha ka jingialang u Dr. Binu Mathew, Associate Professor bad Chairman jong ka College Welfare Advisory Community, NEHU Tura ula ong “Ban pynlong iaka jingpyntreikam ia ka NEP kaba seisoh, ki don katto katne ki mat kiba donkam ban shimkhia da ka jingiatreilang bad da ka jingshim lang ia ka jingkitkhlieh. Ka 5+3+3+4 kan pynkhlain ia ki samla pule naduh ka Basic Level. Ka Klas 6-8 kan don ia ka Coding Vocational Course ryngkat bad ki Indian Language, Klas 9-12 kin ym don shuh ia ki Board Exam bad kan kynthup ia ki 2 tylli ki Foreign Language. Ka kyrdan kaban wan kan dei beit ka Graduation. Ia ki Graduate yn phiah da ka Graduate Certificate, Graduate Diploma bad Graduate Degree. Hadien kane ki Graduate ki lah ban leh ia ka Graduate Research (PG) bad ia ka PHD. Ia ki khynnah ki bym leh ia ka Board Exam, hynrei yn pynlong da ka semester exam. Na ka bynta ki nonghikai kan don ka Teachers Assessment System bad kane ka rukom treikam kadei kaba la pdiang ha ka pyrthei baroh kawei hadien ba la pyntreikam ia ka NEP ha ki 50 tylli ki skulbah kiba pawnam ha ka pyrthei, kane ka jingpyntreikam kan plie lad shibun ia ki samla pule”.
Ula bynrap da kaba ong, “Ka lynti nangne shakhmat ka long ba pynwandur thymmai ia ka Syllabus ban wanrah ia ka jingkylla ha ka jingioh bad jingai jinghikai bad ka jingiateh ki kompani bad ki skulbah”.
Katba u Prof. Sumarbin Umdor, Controller of Exams (CoE), NEHU, ula kren halor ka jingkongsan jongka pule puthi ha ki kyrdan kiba hajrong bad ka jingpule ha ki kyrdan kiba heh kan iarap ha kaban tei ia ka jinglong bad jingtbit jong u briew bad ka lah ban iarap ha kaban noh synniang ia ki jingmut jingpyrkhat kiba thymmai bad ban sam ia ki jingnang jingtip bad ban wanrah ia ka jingkylla ha ka imlang sahlang.
