Guwahati, Nailur 03 : Ka National Investigation Agency(NIA) kala pynlong ka jingkhynra ha ki hynniew tylli ki district jong ka Assam ha kaba iadei bad ki kam pyntriem jong ka kynhun seng lehnoh bala khein beain, ka United Liberation Front of Asom’s (Independent).
Kane ka jingkhynra ka long ruh namar ki kam pynrung dkhot jong ka seng ULFA(I) ia ki khynnah samla bad ka jingdawa pisa jubor na ka bynta ban pynkhlain ia ka jingtreikam ki unit jong ka.
Kila don ki khubor kiba pynpaw ba kala don ka jingai jinghikai ia kine ki khynnah samla ha kawei ka jaka kaba don ha trai jong u lum ha khappud ka India bad ka Myanmar.
“Ha kane ka jingleit khynra kaba la long hynne ka sngi Saitjain, kane ka kynhun kala ioh ban kurup ia ki tiar digital, ki kuli lem bad ki kot ki sla nalor ki kot kiba iadei bad ki jingtreikam jong ka seng ULFA,” ong u heh ka NIA.
Katkum ki khubor la ong ba ka NIA kala pynlong ka jingkhynra ha ki 16 tylli ki jaka hapoh ki hynniew tylli ki district ka jylla kiba kynthup ia ka Kamrup, Nalbari, Dibrugarh, Tinsukia, Sadiya, Charaideo, bad Sivasagar.
Katkum ka kaiphot na ka tnat syntiat la ong ba ka seng lehnoh ULFA(I) kala pynrung dkhot ruh ia ki samla napoh Delhi-NCR kata da ka jingthmu ban pynngop ia ki samla kiba dei napoh Assam.
Nalor kata katei ka tnat syntiat ka dang pynlong ruh ka jingiakren bad ki trai shnong da kaba maham ruh ia ki ba kim dei ban ai jaka riehtngen ia kino kino ki dkhot jong katei ka kynhun.Nalor kata kala pynsngewthuh ruh ia ki paidbah halor ka jingdonkam ban pyntip halor kino kino ki jingjia kiba iadei bad ka jingleit pyniasoh jong ki samla bad katei ka kynhun bala khein beain namar ka jingsngewkhia kam dei tang halor kikam shong shngain hapoh ka jylla hynrei ha ka ri hi baroh kawei.
Shuh shuh katkum ki khubor la iathuh ba dang ha kine ki khyndiat sngi ba la dep, ka seng ULFA(I) ka la pynbna da ka rai pyniap pyrshah ia uwei u dkhot jong ka uba la pyrshang ban phet krad na ka ktem aijinghikai.
