Shillong, Iaiong 20 : Ka Sorkar Jylla kala rai ban pynlait noh ia ka dewlynnong Lumpongdeng na ka jingtyrwa ban tei ia ka 5-star hotel bala tip kum ka Taj Resort & Spa ha Umiam bad kan sa pynkylla ia ka jingiateh kular bad ka Umiam Hotel Pvt Ltd namar ka jingiapyrshah.
Ia kane ka rai la pynbna da u Nongaiktien ka Sorkar MDA bad Myntri Sorkar Bah Wailadmiki Shylla hadien ka jingialang bala pyniaid da u Symbud Myntri Rangbah Bah Prestone Tynsong bad ka kynhun ki Nongialam ka Synjuk ki Rangbah Shnong ka Ri-Bhoi District.
Ka shithi ba pyntip ia kane ka rai ka Sorkar la ai ruh da ka jingthoh lyngba u Joint Secretary ba khmih ia ka Tnad Jngohkai Bah CS Khongwir sha u Chairman ka Green Tech Foundation, uba dang don hapdeng ka jingshah thngan mynta la 12 sngi bad kumjuh ruh sha u Chairman ka SRSRB Bah BB Makdoh.
“Ka Sorkar kala rai ban weng noh ia ka project kam jngohkai na dewlynnong Lumpongdeng hadien b aka Synjuk kala pynsngew ia ka jingsngewkhia ha ka jingialang. Hynrei, kila pynpaw pat ba ki kwah ba ka project kan iai bteng (ha nongkynti ka Umiam Lake Resort)” ong u Bah Wailad haba iakren bad ki nongthoh khubor.
“Hadien ba sngap ia ka jingsngewkhia jong ki, ngi la pynshai ba ka Sorkar, naduh ka sngi ba nyngkong kala kren shai ba ha ka jingiateh kular….kan ym don satia kano kano ka jingtei ha dewlynnong Lumpongdeng” ula iathuh.
“Namar ka Synjuk ki Rangbah Shnong, kiba dei ki kynhun ba don bynta jong ka thain, kila pynpaw ia ka jingsngewkhia na ki paidbah….(bad naba ngi kwah ba) kaei kaba ngi leh, ngi kwah ba ki paidbah kin kyrshan….kumta, ngi pyrkhat ba kan bha eh ia mynta ba ngin weng shuwa ia ka project na dewlynnong Lumpongdeng, hynrei ka original project ha ka jaka ka Orchid kan iai bteng”.
Haba kyntu ia ki dkhot ka Green Tech Foundation ba kin pynsangeh noh ia ka jingshah thngan, u Bah Wailad ula ong “Ngi kwah ban kren shai ba ka Sorkar kam don eiei ban buhrieh halor kane. Ngi ieng skhem halor kane. Kumta, ngi kyrpad ia ki dkhot ka GTF ba kin weng noh ia ka jingshah thngan namar ngi la sngap ia ka jingdawa jong ki”.
Haba kylli ioh don ki kynhun kiba pyrshang ban shim kabu sain pyrthei namar bala jan ka elekshon shiteng samoi jong ka Shillong Lok Sabha, u Bah Wailang ula ong “Khlem pep kane kan don beit. Kin don bun ki briew bad ki kynhun, bad nga sngew ba namar ka elekshon shiteng samoi ka Shillong MP, bun ki kynun kin pyrshang ban shim kabu naka”.
Ha kajuh ka por, ka shithi bala phah da ka Tnad Jngohkai ka ong “Ka dewlynnong Lumpongdeng bah eh 36acre kala lait noh na ka Concession Agreement ba 25 tarik Rymphang 2026 bala iasoi hapdeng ka Tnad Tourism bad ka Umiam Hotel Pvt Ltd (Taj Resort & Spa) bad ia ka jingiateh kular yn sa pynkylla noh ban pynrung ia kane ka rai”.
“Ia ka 5-star Luxury Resort yn sa tei ha ka jaka ba 30 acre kaba ieng ka Umiam Orchid Lake Resort mynta” kala bynrap.
