Shillong, Iaiong 20 : Ka Synjuk ki Rangbah Shnong ka Ri-Bhoi District ha ka sngi Nyngkong kila ai ia ka nongkyrshan ba pura ia ka jingtyrwa ka Sorkar Jylla ban tei ia ka 5-Star hotel ha ka jaka ka Orchid Lake Resort ha Umiam, hadien ba ka Sorkar kala kular ban pynsangeh noh ia ka project kam jngohkai ha dewlynnong Lumpongdeng.
Ia kane ka rai la shim hadien ka jingialang bad u Symbud Myntri Rangbah ba khmih ia ki kam Pohiing bah Prestone Tynsong.
Haba kren sha ki nongthoh khubor, u General Secretary ka Synjuk Bah Pynwanbor Sylliang ula ong “Ngi pynpaw ia ka jingsngewnguh ia kal Sorkar MDA ba ka wanrah ia ka project ha ka district. Ngi kren shai ba ngi kyrshan pura ban tei ia ka Taj Resort & Spa ha ka jaka ba 30 acre jong ka Orchid Lake Resort ha Umiam. Hynrei, ngi Kyrpad ia ka Sorkar ban pynsangeh shuwa ia ka project kam jngohkai ha Lumpongdeng tad haduh ba ngin da rai da kumwei”.
Ula bynrap ” U Bah Prestone ula pynshai ba ka jingtei ia ka hotel kan long ha ka jaka ba ieng ka Orchid. Kumba long mynta, ka Orchid kala treikam la bun bun Snem bad ka por kan sa poi ba kan sa khyllem. Shuwa ba kan jia, ka Sorkar Jylla kala wanrah ia kane ka project jong ka Taj Resort ha ka jaka ka Orchid ha Umiam.
Halor ka dewlynnong Lumpongdeng, u Bah Sylliang ula ong ba ka Synjuk kala kyntu ban pynsangeh shuwa.
“Haba iadei bad ka dewlynnong Lumpongdeng, kumba ngi iohi ba ki riewieid mariang ba iakhih pyrshah ia kane. Ngi la Kyrpad ia ka sorkar Jylla ba kan pynsangeh shuwa ia ka project kam jngohkai ha Lumpongdeng, ia kaba u DyCM ula ai ka jingkulmar. Hynrei u pyntip ba ka project Taj Resort kan sa sdang treikam noh shen ha jaka ka Orchid” ula ong.
U Bah Sylliang ula pynpaw ba ki san dorbar Shnong kiba don ha ka thain Umiam kila kyrshan ia ka project. ” Ngi sngewthuh ba ka project kam ai jingmyntoi ia ki Kynhun ba don bynta na ki san tylli ki Shnong ka thain Umiam. Ngi la Iakynduh ruh ia ki san dorbar Shnong bad iakren halor ka project bad kila pynpaw ba kim kwah ba ka Sorkar kan rah noh shawei ia kane ka project na Umiam hadien ba iohi ba bun ki Nongialam kila tyrwa ia ki jaka jong ki na ka bynta ka project” ula ong.
Ula kdew ia ka jingtyrwa ba dang shen ban rah noh ia ka project, “Ngi la iohi hynnin ba u Symbud Myntri Rangbah Bah Sniawbhalang Dhar ula tyrwa ia ka Sorkar ban rah noh ia ka project sha Wahiajer. Kumta, ka project ba thmu ia mka Ri-Bhoi District ka dei ban neh ha Ri-Bhoi namar kam dei tang ka Umiam kaba don jaka hynrei ngi don kiwei ruh ki jaka ha kiwei ki jaka ban pyntei ia kum kane ka project” ong u Bah Sylliang.
Namar kata, ka Synjuk kam kwah ba kane ka project kam jngohkai kan iaid lait noh na Ri-Bhoi District” ula bynrap.
Halor ka lad pyniasoh,ula ong ba ka hotel kan iahap bha bad ka jingdon ka Umroi Airport.
[8:04 pm, 20/04/2026] ritchie lyngdoh: Pynlait noh ka Sorkar ia ka dewlynnong Lumpongdeng na ka Taj Resort & Spa
Shillong, Iaiong 20 : Ka Sorkar Jylla kala rai ban pynlait noh ia ka dewlynnong Lumpongdeng na ka jingtyrwa ban tei ia ka 5-star hotel bala tip kum ka Taj Resort & Spa ha Umiam bad kan sa pynkylla ia ka jingiateh kular bad ka Umiam Hotel Pvt Ltd namar ka jingiapyrshah.
Ia kane ka rai la pynbna da u Nongaiktien ka Sorkar MDA bad Myntri Sorkar Bah Wailadmiki Shylla hadien ka jingialang bala pyniaid da u Symbud Myntri Rangbah Bah Prestone Tynsong bad ka kynhun ki Nongialam ka Synjuk ki Rangbah Shnong ka Ri-Bhoi District.
Ka shithi ba pyntip ia kane ka rai ka Sorkar la ai ruh da ka jingthoh lyngba u Joint Secretary ba khmih ia ka Tnad Jngohkai Bah CS Khongwir sha u Chairman ka Green Tech Foundation, uba dang don hapdeng ka jingshah thngan mynta la 12 sngi bad kumjuh ruh sha u Chairman ka SRSRB Bah BB Makdoh.
“Ka Sorkar kala rai ban weng noh ia ka project kam jngohkai na dewlynnong Lumpongdeng hadien b aka Synjuk kala pynsngew ia ka jingsngewkhia ha ka jingialang. Hynrei, kila pynpaw pat ba ki kwah ba ka project kan iai bteng (ha nongkynti ka Umiam Lake Resort)” ong u Bah Wailad haba iakren bad ki nongthoh khubor.
“Hadien ba sngap ia ka jingsngewkhia jong ki, ngi la pynshai ba ka Sorkar, naduh ka sngi ba nyngkong kala kren shai ba ha ka jingiateh kular….kan ym don satia kano kano ka jingtei ha dewlynnong Lumpongdeng” ula iathuh.
“Namar ka Synjuk ki Rangbah Shnong, kiba dei ki kynhun ba don bynta jong ka thain, kila pynpaw ia ka jingsngewkhia na ki paidbah….(bad naba ngi kwah ba) kaei kaba ngi leh, ngi kwah ba ki paidbah kin kyrshan….kumta, ngi pyrkhat ba kan bha eh ia mynta ba ngin weng shuwa ia ka project na dewlynnong Lumpongdeng, hynrei ka original project ha ka jaka ka Orchid kan iai bteng”.
Haba kyntu ia ki dkhot ka Green Tech Foundation ba kin pynsangeh noh ia ka jingshah thngan, u Bah Wailad ula ong “Ngi kwah ban kren shai ba ka Sorkar kam don eiei ban buhrieh halor kane. Ngi ieng skhem halor kane. Kumta, ngi kyrpad ia ki dkhot ka GTF ba kin weng noh ia ka jingshah thngan namar ngi la sngap ia ka jingdawa jong ki”.
Haba kylli ioh don ki kynhun kiba pyrshang ban shim kabu sain pyrthei namar bala jan ka elekshon shiteng samoi jong ka Shillong Lok Sabha, u Bah Wailang ula ong “Khlem pep kane kan don beit. Kin don bun ki briew bad ki kynhun, bad nga sngew ba namar ka elekshon shiteng samoi ka Shillong MP, bun ki kynun kin pyrshang ban shim kabu naka”.
Ha kajuh ka por, ka shithi bala phah da ka Tnad Jngohkai ka ong “Ka dewlynnong Lumpongdeng bah eh 36acre kala lait noh na ka Concession Agreement ba 25 tarik Rymphang 2026 bala iasoi hapdeng ka Tnad Tourism bad ka Umiam Hotel Pvt Ltd (Taj Resort & Spa) bad ia ka jingiateh kular yn sa pynkylla noh ban pynrung ia kane ka rai”.
“Ia ka 5-star Luxury Resort yn sa tei ha ka jaka ba 30 acre kaba ieng ka Umiam Orchid Lake Resort mynta” kala bynrap.
