Shillong, Nailur 12 : Baroh ki jingiakhun ba dang sah jong ka Shillong Premier League mynta ka samoi kin sdang noh naduh ka por 3:15 baje janmiet bad ym dei shuh 3:45 baje janmiet kumba ju long baroh shi katta ha madan Third Ground, Polo.
Ka jingiakhun ba khatduh ha katei ka lympung kan long ha ka 30tarik mynta u Nailur hapdeng ka kynhun kaba iohrah ia ka nam lahduh ka Mawlai Sports Club, bynrap shuh shuh ka kyrwoh na ka Shillong Sports Association.
Ki bor pyniaid ha ka jingpyllait ia ki program ialehkai ba thymmai ki pyntip ruh ba ha ka sngi ba don ka jingiakhun ba khatduh kaba dei hapdeng ka Mawlai Sports Club pyrshah ia ka Langsning ka jingiakhun kan long noh ha ka por 3:00 baje janmiet ban ailad kham kylluid ka por na ka bynta ban sam khusnam bad kiwei kiwei.
Ha kane kajuh ka sngi yn sam ruh ia ka khusnam sha ka kynhun kaba wan ba ar kata kaban ia knieh hapdeng ka Langsning bad Rangdajied FC nalor kiwei kiwei pat ki khusnam.
Ka jingiakhun kaban bteng biang ha ka 14tarik kan dei hapdeng ka Nangkiew Irat kaba don mynta 16 point pyrshah ia ka Malki kaba don ha ka kyrdan ba 7 bad ruh da ki 7 point. Ha ka kylla ba nyngkong ka Nangkiew Irat ka la ioh ban pynliem da 3-1 kol ia ka Malki.
