Shillong, Nailur 12: Ka Dorbar Synrai jong ka Iingdorbar Thaw Ain ka Jylla, hynne ka sngi nyngkong, kala kyntait ban pdiang ia ka jingiatai halor ka Bill ban pynduh pyndam noh ia ka ain khalai bala wanrah da u MLA ba marwei ka KHNAM Bah Adelbert Nongrum.
Kane ka Bill bala ai kyrteng ka The Meghalaya Regulation of Gaming (Repealing) Bill, 2022 la wanrah da une u MLA ka KHNAM hynrei ka Iing kala kyntait ban pdiang ia ka jingiatai da ka voice vote.
“Kiba ong ‘Em” ki bun paid. Ia kane ka motion ym shym la ailad ban pyniaid shakhmat bad ia ka Bill la kyntait da ka Iing” ong u Lamphang Bah Metbah Lyngdoh hadien bala buh ia kane ka Bill ha ka rynsan ban ia vote.
Haba u Bah Adelbert ula pynpaw ia ka jingbym sngewtynnad ia kane ka rai, u Bah Metbah ula ong “Nga la shim ia ka jingmynjur jong ka Iing bad ka iing kam pdiang satia ia ka Bill. Namar kata, ia kane ka Bill la kyntait da ka Iing”.
U Lamphang ula ai jingmut ia u Dkhot da kaba ong “Phi lah ban wanrah biang ia kane ka mat ha kawei pat ka dur. Ia mynta hi, kane ka Bill kala shah kyntait ha ka Iing”.
Shuwa kane, wanrah ia kane ka Bill, u Bah Adelbert ula ong ba ka Bill ka dei kaba la wanrah ban ithuh bad burom ia ka jingsngew jong ki paidbah ka Jylla, ban pynthikna baka Meghalaya of Prevention of Gambling Act, 1970 kan ym shah pyntroin noh bad ban pynduh pyndam ruh ia ka Meghalaya Regulation of Gaming Act, 2020.
Ula ong ba ka long kaba donkam ban da thew ia ka jingthmu jong ka Sorkar Jylla ha kaban pynmih khajna naka kam khalai khamtam halor ka jingmih jong ki jingpyrshah na ki kynhun bapher bapher ia ka sienjam ban buh Casino hapoh ka Jylla.
