Shillong, Jylliew 23: Ka Jaintia Students Union Jowai Circle, hynne ka 23 tarik u Jylliew kala pynkynmaw ia ka Sorkar Jylla halor ka jingdawa ban pyntreikam noh ia ka Maternity & Child Health Hospital kaba don ha ka shnong Panaliar, Jowai.
Kane ka Seng ki samla pule na Jaintia Hills, kala pynkynmaw ia kane lyngba ka shithi bala phah u Myntri Rangbah ka Jylla Conrad Kongkal Sangma, u Myntri ka tnad ka Koit ka Khiah ka Jylla James PK Sangma bad sha u Director ka Health Services (MI) Dr Aman War hynne ka sngi.
Kat kum kane ka shithi, ka JSU kala pyntip baka MCH Hospital ha Panaliar ka dei kaba la biang nadong shadong bad kaba sah mynta ka long satang ba ka Tnad ka Koit ka Khiah kan pyntreikam ia kane ka Hospital ha kaban ai ka jingshakri ia ki Longkmie ba armet bad ki Khunlung khynnah kiba donkam ia ki jingsumar.
Nalor kane, ka JSU kala pyntip ruh ba dang shen ki nongialam ka seng kila leit jurip ia ka Civil Hospital ha Ialong bad la shem ia ka jingduna ki jingthiah ha Maternity Ward, kaba la pynlong ia ki longkmie kiba pun khun ban hap thiah ha ki lynti iaid jong ka hospital.
Ka seng ka dawa jur ba dei ban pyntreikam noh ia ka MCH Hospital bad ban sdang noh ka jingshakri kumba la mang ia ka khnang ba ki Longkmie ba pun khun bad khunlung kin ioh ia ka jinhmgsumar kaba paka la ka dei ha ki OPD, ICU, NICU, OD, Labor Room bad kiwei kiwei ba don ha ka MCH.
