Shillong, Nailar 09 :Ka kynhun Myntri jong ka Sorkar Jylla hynne ka sngi ba-ar kala mynjur ia ka jingpynkylla thymmai ia ki kyndon jong ka Meghalaya Judicial Service Rules 2006 bad ka Meghalaya Higher Judicial Service Rules 2015, kaba kren ia ka jingdonkam ban pynlong kongsan ia ki nongialeh eksamin ba kin pass ia ka Khasi lane Garo kum ka Compulsary Paper.
Haba kren sha ki lad pathai khubor hadien ka jingialang, u Myntri Sorkar James PK Sangma ula ong ba kane ka jingpynkylla kala wan hadien jong ka jingialang jong ki dkhot ba pura ka Iingkashari Meghalaya High Court ba long ha ka 9 tarik Jymmang, kaba rai ban pynkylla ia ka Schedule 9 jong kine ki Rule.
“Haba iadei bad ka Meghalaya Judicial Service Rules, dei ban pynkylla noh ia ka Schedule B jong ka Rule ban wanrah ia kawei ka compulsory paper kata ka Paper IV kaba dei ha ka ktien Khasi lane Garo bad kane ka paper kan long kongsan ia kaba ka jingioh marks ba bun eh yn sa buh hadien hynrei lada ki nongialeh eksam ki ioh duna ia ka mark bala buh, yn khein ba ki khlem pass bad yn ym khein shuh ruh ia ka jingioh marks ha kiwei kiwei ki paper” ula ong.
“Haba iadei bad ka Meghalaya Higher Judicial Service Rules, 2015, ki juh ki kyndon kin sa kynthup lang ha ka Schedule B ba pynlong kongsan ia ki nongialeh eksam ban don jingtip la ka long ia ka ktien Khasi, Jaintia lane Garo kynthup ia ka jingpynlong kongsan ia ka paper Khasi lane Garo ha ka por thoh eksam. La ong ba lada ki nongialeh eksam ki ioh duna ia ka marks bala buh, yn khein ia ki ba ki khlem pass bad ym khein shuh ruh ia ka jingioh marks na kiwei kiwei ki paper” ong u James.
Ha kajuh ka por, u Myntri ula ong ba kane ka rai ka dei kaba biang palat khamtam ba ka Jylla ka dang ialeh ban pynrung ia ka Ktien Khasi bad Garo ha ka khyrnit ba phra jong ka riti synshar ka Ri India.
