Shillong, Nailar 06:Ka Executive Committee jong ka Dorbar Shnong Nongkseh ha ka sngi Saitjain ka la pynkup burom ia ki nongiakhun kti na ka shnong kiba la khur takma ha ki lympung iakhun kiba long ha ka Ri kumjuh ruh kito kiba jop ha ki jingiakhun kiba long ha ka jylla.
Na ka liang ka shnong ka la ai ka song pisa ba kyrpang ruh ia ki arngut ki rangbah, kata u Bah Everson Thangkhiew kumjuh ia u Hubert Paliar kiban mihkhmat ia ka Ri ha ka International Arm Wrestling Championship kaban long ha Turkey.
Lah ban kdew hangne ba u Bah Everson u la ioh ban khur haduh ar tylli ki takma ksiar ha ka National Arm Wrestling Championship kaba long dang shen ha Hyderabad.
Ha katei ka prokram kaba lyngkot la ioh ruh ia ka jingkren na u President ka Nongkseh Sports Social and Cultural Club, Bah Nathaniel Thangkhiew, nangta na u Chairman Bah AL Thangkhiew, Bah R Thangkhiew, Bah Fabian Thangkhiew General Secretary ka Club kumjuh ruh ka jingkren ba lyngkot na u Bah Everson Thangkhiew.
La pynphuh ruh ia ka jingialang da ka jingdonlang ki nongkitkam jong ka Seng Kynthei bad ki nongkitkam jong ka shnong.
