Nongstoiñ, Nailar 6: Ka Federation of Khasi Jaiñtia and Garo People Mawliehbah Area ka la mana tyngeh ïa ki riew shim kabu ban pynïap dusmon ïa ki dohum dohwah ha ki wah kiba khap hapoh ka Area Mawliehbah baroh kawei.
Kane ka jingmana ka long eh khamtam ha ki ar tylli ki wah kata ka wah Riwiang bad ka Wah Malen bad kiwei kiwei ki wah rit kiba hap hapoh ka don ka thaiñ hi baroh kawei.
Ka Seng ka la mana tyngeh ruh ban kem doh pathar da kaba siat bom, ai bih tutia, kharew, shun, jaiur, khang jar bad kiwei de ki jait bih, khamtam ha kane ka por ba ka ki doh ki sdang kha pylleng bad ka um ruh ka dang rit bha. Lada lap ïa kum kine ki riew shim kabu ka seng kan sa leh da kaba tyngeh.
Ka seng ka wer ruh ïa ki nongshnongshnong jong ka dong ka thaiñ ba kin kiar na ki jingthang kulmar ïa ki lum bad ki khlaw ki btap khnang ban wanrah biang sa shisien ïa ka jing itynnad ka mariang ha ki lum ki wah.
Ha kajuh ka por ka seng ka adong tyngeh ïa ki briew ba pynïap dusmon ïa ki mrad khlaw kiba shong ba sah ha ka dong ka thaiñ.
Ka seng ka ïa wer ki Synjuk VDP, ki Sordar bad Secretary Shnong, Seng Samla Shnong bad kiwei kiwei ki seng trei mon sngewbha, ban ai ka kti ka mon kti ka diang, khnang ban lah ban rat diengkhong ïa kine ki kam ki ban pynduh jait ïa kine ki kam ki ban pynjot ia ka mariang hapoh ka dong ka thaiñ.
