Nongstoin, Nailar 06: Ka Ophis u Deputy Commissioner ka West Khasi Hills District hynne ka sngi saitjain kala rakhe ia ka World Day Against Human Trafficking da kaba pynlong ia ka jingialap ban pynsngewthuh halor ka lynti ban iakhun pyrshah ia ki kam khaii ia ki Khunlung khynnah.
Ia kane ka jingrakhe la pynlong ha ryngkat ka jingiatreilang bad ka National Commission for Protection of Child Rights (NCPCR) ryngkat ka Meghalaya State Commission for Protection of Child Right (MSCPCR).
Ia kane ka jingialang la pynlong ha Conference Hall jong ka ophis treikam u Deputy Commissioner, ha kaba la iadonlang ki ADC kiba kynthup u bah H.K. Thabah, bah W. Shabong District Child Protection Officer, kong V. Blah Deputy Labour Commissioner kaba dei ruh ka Chairperson bad ka dkhot jong ka Child Welfare Committee, ka dkhot jong ka Juvenile Justice Board, Special Juvenile Police Unit and Anti Human Trafficking Unit.
Ka jingthmu jong kane ka programme ka long ban pynsngewthuh їa ki paidbah nongshong shnong, їa ka jingsniew jong ka jingpyntreikam jubor ia ki khynnah ha kino kino ki jaka treikam.
Ha katei ka prokram la pynshai ruh ba ka jingthombor ïa ki khynnah kiba dang rit karta, la ka long ha kino kino ki liang, ka long kaba beaiñ haduh katta katta. Ha katei ka sngi, ka Kong Smirta. K. Shah Senior Technical Expert National Commission for Protection of Child Right, ka la batai shai bha halor kitei ki mat kiba donkam.
