Nongstoiñ, Nailar 6: Ki paid Nongshongshnong jong ki 48 tylli ki Shnong kiba hap hapoh ka ki lai tylli ki Constituency ka West Khasi bad Eastern West Khasi Hills, kila pynpaw ia ka jingbynniaw kaba jur halor ka jing pynsangeh syndet jong ka Sorkar ban pyntreikam ia ka skhim Mahatma Gandhi National Rural Employment Guarantee Scheme (MGNREGS) mynta la palat shisnem tam ha ka thain.
Ia kane la pyntip da u Bah Charles Sohshiang uba dei uwei na ki Nongialam Shnong ka Shnong Marngor uba dei ruh u Secretary barim ka VEC, uba la pyntip ba kine ki shnong ki dei kiba hap hapoh ka Nongstoin, Rambrai-Jyrngam bad ka Mawthadraishan Constituency.
Une u Rangbah ula ong ba ka jingpynsangeh ban pyntrei ia kane ka skhim ka Sorkar Pdeng kala sdang naduh ba pynkha ia ka District thymmai kaba la tip kum ka Eastern West Khasi Hills District namar ka jingdon jong kiba bun ki shnong kiba la pynhap ha kane ka District katba ki Constituency pat ki hap ha West Khasi Hills.
“Haduh mynta ka Sorkar kam pat lah satia ban pynthikna ia u pud u sam jong ki shnong ki thaw, ki jaka puta jong kane ka District ba thymmai, kaba la wanrah ia ka jingkulmar bad jingduhnong ia ki paidbah ban ioh ia ki skhim bala mang da ka sorkar Pdeng” ula ong.
“Lehse dei na katei ka daw ba ka sorkar ka la pynsangeh noh ban pyntreikam їa ka skhim shispah sngi” ula ong.
Nalor kata u la ong ba wat tang їa ka pisa jong ki jingtrei kiba la dep pyntrei shuwa ban phiah District, kaba dei tang ka pisa bai thied tiar jong kitei ki sawphew phra tylli ki shnong, ka sorkar kam pat shym la lah ban siew dep bad lada kheiñ lang ka la poi da ki spah klur tyngka.
U bah Sohshang u la ong ruh ba ka jingpynsangeh jong ka sorkar їa ka jingpyntrei їa ka skhim shispah sngi ha kine ki shisnem tam mynta, ka la ktah haduh katta katta їa ka їoh ka kot jong ki longїing long sem bad da ki hajar ngut ki job cards ki la duh їa ki kam bylla kam sngi jong ki.
Ha kajuh ka por u la ong ba kiba bun ki job cards holder ki dei ki nongrep bad ki nongbylla, hynrei naduh ba ka khlam covid 19 ka la wan lynshop ha ka jylla ka jingkyrduh bylla ka la ktah haduh katta katta ha ki shnong ki thaw bad haman la ki jaka.
U la ong ba ka sorkar ka la dei ban pynsted ha ka ban pynbeit ia kine kiei kiei bad ba kan pyllait noh tang їa ka pisa bai thied tiar jong ka skhim shi spah sngi bala dep pyntrei ha kine ki snem kiba la dep.
