Nongpoh, Nailar 05: Ka KSU Tyrso Unit hapoh ka jingïalam jong u samla Player Mashli President hynne ka sngi kala leit khang tala syndon ïa u tower airtel ba don ha Tyrso hadien ka jingud jingnam jong ki paidbah naka jing bym treikam ka network airtel ha katei ka thaiñ.
Naka liang u Samla Player Mashli u la ong ba kum ka seng ka dap da ka jingsngewkhia kaba jur halor ka jingeh ba ki paidbah ki ïakynduh nakadaw ka jingbym biang ka network airtel ha katei ka thaiñ kaba la wanrah ia ka jingduhnong kaba khraw watla ki hap ban thep pisa haki simcard jong ki hynrei kim ioh pyndonkam.
U la ong ruh ba ka jingdon u tower Airtel ha katei ka thaiñ kam don jingmut namar ki paidbah ki ioh pyndonkam tang 1 kynta lane 2 kynta.
Ka seng kala buh ruh ka jingkyrpad ïaka kompani Airtel ba ka dei ban pynbiang mardor ïa ka network ha katei ka thaiñ bad kam dei ban plie ïa utei u tower tad haduh ba kan da lah ban pynbiang ïaka network naka bynta ka jingbit jingbiang jong ki paidbah.
