Nongpoh, Naiwieng 09 : Ka Northern Ri-Bhoi College, hynne ka sngi, kala pynkup burom ia 25 ngut ki samla pule kiba la pyndep a ka Bachelor of Arts, kiba dei ruh ki soh ba nyngkong jong ka College ban pass ia kane ka kyrdan pule.
Ka Northern Ri-Bhoi College ka dei ka college bala seng ha u snem 2021 ha ka thaun Umden.
La pynshongkun ia kane ka jingialang pynkup burom da u MLA bad Chairman ka College Bah Mayralborn Syiem, kaba dei ruh shibynta jong ka jingpynhap pyrda ia ka taiew lehkmen jong ki samla pule ka College, ha ka jingiadpnlang u Principal ka Ri-Bhoi College EC Bennu, Principal ka Nongtluh Higher Secondary School Bah Hesting Syiem bad kiwei kiwei.
Haba ai jinkgren, u MLA ula pynpaw ia ka jingkmen ba kum ka shlem ai jingnang jingstad ba dang shu sdang shen, kala lah ban pynmih ia ki samla pule kiba la pass ia ka Graduation jong u snem 2023-24, kaba pynurlong ia ka jingangnud bad jingphohsniew jong u Bah D.D Lapang ban wanrah da ka college ha ka thain na ka bynta ka bha ka miat ki samla pule.
“Watla kam long kaba suk ia ki bor pyniaid jong ka Northern Ri Bhoi College ban pyntyllun ia ka kam jong ka college namar haduh mynta kam pat don ia ka building kaba pura hynrei la shu pyndonkam da ki kamra skul barim ka Nongtluh Higher Secondary School, nalor ka tulop kaba biang ia ki nonghikai, hynrei ka long pat kaba ai mynsiem shikatdei ba ki samla pule kila treishitom ha ka ban ialeh bha ha ki eksam bad kyrmen skhem ba shen kine ki jingeh baroh yn lah ban weng noh mardor”, ong u Bah Mayral Born Syiem.
Kum u nongmihkhmat paidbah bad ruh kum u wei na ki dkhot jong kane ka Kolej, u la kular ban un shimkhia ban wad ia ki lad ki lynti kumno ban weng ia ki jingeh ban pynioh ia ki jingdonkam hapoh kane ka Kolej.
