Shillong, Naiwieng 15 : Ka Myntri ka Koit ka Khiah kala pynksan ia ka nongrim ka Sorkar Jylla halor ka jingdawa ki Nongtrei ASHA da kaba ong ba ki ASHA ki dei ki nongtrei monsngewbha (Volunteer) kiba wan hi da ka monsngewbha lajong bad ka Sorkar naduh kaba sdang, kam shym la kular ban siew tulop ne siew ia kano kano ba palat ia ki kam bala ai ban trei iaki ASHA.
Ka Myntri kala pyntip ruh ba kawei ka Nongtrei ASHA (ASHA) na Kyrdem Public Health Centre (PHC) kala ioh kamai haduh T.82000 kum ka jingtrei ia ki kam bala ai ryngkat ka honorarium tang hapoh ka hynriew bnai.
Ka Myntri kala pyntip ia kane haba kdew ia ki jingkhein bala buh da ka Tnad ka Koit ka Khiah haba iadei bad ka jingsiew bala ai sha ki Nongtrei ASHA kiba don ha palat 7000 tylli ki Shnong hapoh ka Jylla Meghalaya.
Kat kum ka jingkhein na ka OPhis, kiba bun ki Nongtrei ASHA kila ioh sei ia ka jingsiew ba long hapdeng T.23000 haduh T.82000 ha ki hynriew bnai bala leit kata naduh ka 1 tarik Iaiong haduh 30 tarik Nailur 2023, kaba long kat kum ki Tarik ba thep ia ka pisa ha ki Bank.
“Nga la khmih bha ia ki receipt bala siew sha ki ASHA…..Nga kyndit ban iohi ba kine ki Volunteer kila ioh kamai bha” ong ka Myntri haba iakren bad ki lad pathai khubor hadien ka jingialang bad ki Heh Ophisar ka Tnad ka Koit ka Khiah.
Haba pynpaw ba ka jingiadei kam bad ki ASHA kala shai kdar naduh ka sngi ba nyngkong ba ka dei tang ka kam trei mon sngewbha, ka Myntri kala ong, kam shym la don satia ka jingkular ia kano kano ka jingsiew tulop ne ka jingkular ia kano kano kaba long palat ia ki kam ba la ai ban trei da ki ASHA.
Ki Nongtrei ASHA hapoh ka lama jong ka Meghalaya ASHA Workers’ Union (MASHAWU) kila pynlong ia ka jingsangeh trei kam ba khlem pud naduh ka 7 tarik Naiwieng, kum ka dak ban pyrshah ia ka jingleh mynthi ka Sorkar halor ki jingdawa jong ki ba kynthup ia ka jingkyntiew ia ka honorarium n aka T.2000 sha ka T.5000.
Ka Myntri kala ong ba ka don ka jingpyrkhat bakla ba ka Sorkar Jylla kam shym la leh eiei na ka bynta ki ASHA bad ong “Ka kamram jong nga ka long ban pyntip sha ki paidbah ba kam dei kaba shisha. Balei ngin ia kata?.
Ka Myntri kala pyntip ba ka Sorkar ha u snem 2021-2022 kala pynlut haduh T. 91.2 klur ban siew ia ki jingsiew ba manla u bnai sha ki ASHA.
Na kane, ka Sorkar kala sei haduh T.16.32 klur na ka bynta ka jingsiew ba manla u bnai jong ki ASHA bad siew pynkhuid ruh ia ka jingsiew ba sahteng kaba long haduh T.53 klur nalor ka T.21.96 klur ka jingai jingmyntoi lyngba ka NHM.
“Ha u 2022-2023, ka pisa ba sahteng ka long Nod. Ngi dang kynshew sa T.16.98 klur ban siew ia ka jingsiew ba manla u bnai kata T.2000 sha ki ASHA bad kiwei pat ki jingsiew napoh ka NHM ngi lah pynlut haduh T.22.68 klur tang ia ki ASHA. Baroh lang kala kot haduh T.40.5 klur” kala bynrap.
Haba kyntu ia ki Nongtrei ASHA ba kin pynsangeh noh ia ka jingiakhih bad ban wan sha ka miej jingiakren, ka Myntri kala ong “Ban dawa ia la ka hok ka dei kawei ka kam hynrei ban nym kheinsnep ialaka kamram ka dei kawei pat. Wat pynbor ia ngi, ngi kwah ban bteng ha kaban iatreilang bad phi. Ngi da sngewnguh iaki kam ba phi trei. Lada phi dang donkam sa kawei ka jingiakren bad ka Myntri, Ngam dei ka Myntri ba shu long hi, ki dei ki paidbah kiba la wanrah ia nga sha kane ka Ophis bad ka dei ka kam jong nga ban sngap ia phi”.
“Ki (ASHA)ki dei ki nongtrei monsngewbha kiba wan hi dala ka jong ka mon. Katba nang bun ki sngi ba phi pep na ka kam kum ki Health Facilitator ha ki shnong jong phi, ka jingktah kan long ia ka shnong jong phi hi namar phi la shim ia ka jingkit khleh, ngam kwah ban poi ha uta u pud ha kaba nga hap ban bthah ia ki PHC ba sngewbha ban leh eiei bad ban thung noh da kiwei ki briew namar kam iahap ban leh kumne. Ngi burom ia ki. Ka burom ka dei ban long markylliang” ong ka Myntri.
Ha kajuh ka por, ka Myntri kala ai khublei ruh ia kiba bun ki Nongtrei ASHA kiba dang iai bteng ban trei beit ia ka kam wat hapdeng ka jingsangeh treikam bad ong “Namar ki iohi shisha ia ka jingma jong ki jingim ki briew hala Shnong, kila bteng ban trei iala ka kam”.
