Arunachal | Leit iarap sa ka IAF ban wad ia ki briew ba shah rong ha ka umsaw ha Keyi Panyor

Itanagar, Jylliew 25: Ki shipai jong ka Indian Air Force (IAF) ka la ïasnohkti lang ha ka jingwad ia kisaw ngut ki briew ki ba jah rngai ha ka jingshlei um kaba shyrkhei bad ka jingtwa khyndew ha Keyi Panyor district jong ka Arunachal Pradesh.

Ki kynhun na ka State Disaster Response Force (SDRF), ki pulit, ki bor synshar district bad ki shipai IAF ki dang wad ia u Elesh Marak, u Baleria Marak, u Tao Angina bad u Sourav Kumar, katba ia ka met jong u Nirmal Gupta la sei ha ka janmiet sngi Balang.

Katei ka jingshlei um ka la lynshop ia ka NEEPCO Colony ha Poosa ha ka step jong ka sngi Balang, ha kaba ka la rong noh ïa ki ïing ki sem, ka la pynjulor ïa ki jingtei bad ka la wanrah ïa ka jingtwa khyndew kaba la pynduh ïa ki katto katne ki surok.Ki kynhun pynlait im ki dang iakhun tyngeh ban pynïoh biang ïa ka surok da kaba pynkhuid ïa ki jaboh jabaiñ, ki sboh bad ki mawsiang kiba heh na ki lynti ba kongsan.

Kane ka jingjia ka la pynthut ïa ka jingim kaba man ka sngi ha kylleng ki bynta jong ka Arunachal Pradesh, ha kaba u slap uba bteng u la wanrah ïa ka jingjulor kaba jur ha ki surok bad ki jingtei ka tnad bording.

Ha Sagalee subdivision, u Additional Deputy Commissioner u Kipa Raja u la pynlong ia ka jingialang ban bishar bniah bad ki heh jong ka tnad bording hadien ba u slap uba jur ha Toru Circle u la pynjulor ia ki katto katne ki lain bording kiba don ha shi lynter ka lynti ban pynpoi bording, kaba la pynlong ia ka jingduh bording kaba slem.

Ki bor pyniaid ki la iathuh ba ki jingtrei ban bishar bad pynbha pat ki dang iaid shakhmat, bad la kyntu ia ki nongshong shnong ban long kiba iaishah katba ki jingpyrshang ki dang iai bteng ban pynioh biang ia ka bording kumba ju long.

Ka jingther jong u slap ka la pynlong ruh ïa ka jingtwa jong kawei ka bynta jong ka surok bah Manmao-Changlang hapdeng ka Jukhi barim bad ka Jukhi thymmai, kaba la pynjur ïa ka jingeh ha ka jingïadei ha ka jylla.

Katba uwei u ophisar ka tnad pule puthi ha ka thain u la mih kum u riewshlur bym lah ban long hapdeng ka jingshah pynjulor.

U Chukhu Paije, uba dei u Block Education Officer (Academic) jong ka Keyi Panyor district, u dang leit sha Itanagar, ha kaba u lyoh uba kynsan kynsan u la rong noh ia ka surok hapdeng Yazali bad Hoj. Ha ka jaka ban ap ba ka surok kan plie biang, u la ïasoh bad ki nongpyllait im bad ki nongtrei mon sngewbha na ka thaiñ ha kaba wad ïa ki briew kiba jah bad ha kaba ïarap ïa ki longïing kiba shah ktah.

U Paije u la ong ba u la don bynta ha ki kam ai jingiarap bad pyllait im ha kine ki ar sngi ba la dep bad un dang iai bteng ban sah ha katei ka jaka ba la jia ka jingshah pynjulor haduh ban da wanphai biang ka jinglong jingman.

U Myntri Rangbah ka jylla u Pema Khandu u la pynpaw ïa ka jingsngewsih kaba khraw halor kane ka jingjia ba sngewsih bad u la pynthikna ban ai jingïarap katba lah sha ki longïing kiba la shah ktah.

“Baroh ki tnad ba dei peit, kynthup ïa ka bor synshar district, ka NEEPCO, ka SDRF, ki Pulit bad ki kynhun sumar, ki ïashim bynta shitrhem ha ki kam pyllait im bad ai jingïarap.Kawei pa kawei ka jingïarap kaba lah ka long la pynpoi sha kito kiba shah ktah,” ong u Myntri Rangbah ka Jylla.

U Myntri khynnah ka jylla u Mama Natung u la ong ba ka jingjur jong u slap bad ka jingtwa khyndew ka la khanglad ia ki katto katne ki surok ha Keyi Panyor bad Papum Pare, kynthup ia ka surok Sagalee-Hoj, surok Pitapool-Toru, Pitapool-Hoj Road bad Kimin Bypass.

Ki bor pynïaid ki la bthah ïa ki paidbah nongshong shnong bad ki nongleit nongwan khamtam kito kiba leit sha East Kameng, Pakke Kessang, West Kameng bad Tawang district ba kin kiar na ki lynti ba shah ktah haduh ban da biang ka jingpynïasoh ki surok.

Da ki kynhun pynlait im kiba ïakhun pyrshah ïa ka por bad u slap uba jur u dang bteng ban lynshop ïa ka thaiñ, ka jingkhuslai ka dang jur bha ha Keyi Panyor katba ki longïing ki dang ap ïa ka khubor jong kiba ieid ba thoiñ jong ki kiba la jah.