Shillong , Iaiong 19: U Myntri Kam Pynroi Sor ula ong baka sorkar ka dang pynkhreh mynta iaka jaka ban pynshong noh shijaka ia baroh ki nongdie madan kiba dei jingdie ha kylleng ka nongbah Shillong.
“Ia mynta hi ngam pat kwah ban batai eiei iaka jaka hynrei ngi la don iaka jingthmu ban buh ia ka jaka kaba ki nongdie madan kin ioh ban shong die jingdie shirta shijaka bad ngin pyrshang ban ialeh ban pynrung lut ia ki baroh kiba la dep rejistar ha katei ka jaka” ong u Bah Sniawbhalang Dhar haba iakren bad ki nongthoh khubor.
Ula ong ia katei ka jaka shongdie jingdie yn pyrshang ban buh hi hapoh ka nongbah Shillong namar lada buh shabar ka nongbah, kan ym don jingmut eiei bad kan ktah iaka jingkamai jakpoh ka jongki. “Kumta ngi hap ban pyrkhat ba kin lah ban die bad ban kamai bad ka tnad sorkar ka dang pynkhreh shaid shaid halor kane ka bynta”.
Ha kawei pat ka liang ula iathuh ba ki projek kiba iadei bad ka Smart City kila iaid beit shakhamt hynrei ka jingshna iaka Smart Road ka dang sahteng namar ba ki dang ap ia kiwei pat ki tnad sorkar kum ka PHE ba kan pyndep iaka jingweng ia ki pipe bad kumta ter ter.
Ula iathuh ruh ba ha kataiew ban wan, yn sa leit ban jurip iaka jingtei iaka Iew ha Polo bad Laitumkhrah hynrei kitei ki projek kila iaid shakhmat bad yn ialeh ban shna pyndep noh ia ki kham kloi.
