Nongpoh, Iaiong 19: Ka Synjuk Ki Rangbah Shnong Ri Bhoi District, ka la dawa na ka sorkar Meghalaya Democratic Alliance-2, ba kan iasaid tyngeh ha kaban pynthikna ba ki 22 tylli ki Shnong khappud ka Ri-Bhoi District ba don hapdeng ka jingiakajia pud, kin iai neh ha ka Jylla Meghalaya ha ka jingiakren pynbeit pud jong ka kylla kaba ar bad ka Assam.
Kane ka jingdawa kala mih na ka jingialang jong ka Synjuk ki Rangbah Shnong ka Ri-Bhoi, kaba long hynne ka sngi Balang ha Auditorium, Umsning.
Haba iakren bad ki nongthoh khubor hadien ka jingialang, u General Secretary ka Synjuk Bah PB Sylliang ula pyntip b aka jingialang kala iatai sani bha ia kane ka mat bad kala pynshongdor ia ka sur u paid nongshongshnong na kine ki 22 shnong ka Ri-Bhoi District ki bym kwah ban leit sha Jylla Assam.
U pyntip b aka Synjuk kala rai ban dawa ia ki 5 ngut ki MLA ka District kiba iadonlang ha ka Regional Committee ka Ri-Bhoi bala khlieh da u Symbud Myntri Rangbah ka Jylla Bah Prestone Tynsong, ba kin ban khia bha ha kaban iakhun ba kine ki shnong ki dei ban hap beit sha Meghalaya.
Ha kajuh ka por, ka Synjuk kala rai ruh ban dawa ia ka Sorkar Jylla ba kan pynjynsur noh ia ka dor bai register ia ki jaka ki puta kaba la ktah shikatdei eh ia kito kiba thmu ban register iala ki jong ki jaka namar ka jingrem kput palat.
Ula ong ba ka jingeh ka mih ba ki briew ba thmu ban shim ram na ki Bank ki hap ban bsut lang ia ka dulir jaka bala register ha ka Sorkar ym ki dulir bala register ha ka District Council. U pyntip ba ka Synjuk kan sa leit iakynduh ia u Myntri ka Tnad Revenue ban iakren halor kane ka kam.
Haba iadei pat bad ka jingpynlip bording elektrik khah khah jong ka MeECL kaba la ktah shikatdei eh ia ka khaii ka pateng, ka trei ka ktah bad khamtam eh ki samla pule, ka Synjuk kala dawa ia ka MeECL ba kan pynjynsur noh ia ka por pynlip bording. U pyntip ba ka synjuk kan sa leit buh da ka dorkhas sha u CEO ka Tnad MeECL ha Umiam ha kine ki khyndiat sngi ban wan.
