Shillong, Jylliew 23 : Ka Meghalaya kala sdang ban pynkhlain ia ki jingpynkheh hapdeng ki jingbatai lypa ba kan don ka jinglynshop ka El Niño, kaba lah ban ktah ia ka rukom ioh slap, ka jingrang rkhiang ka suinbeng ka ban eh da ki sngi, bad ka jingktah ia ka rep ka riang ha ka Jylla baroh kawei.
U Myntri Rangbah ka Jylla Conrad K Sangma ha ka sngi Ba-ar ula pyniaid ia ka jingialang jong ka Meghalaya Climate Council ban iabishar ia ki jingma ki ban ktah ia ka Jylla bad ban thaw ia ki buit treikam kumno ban pynduna ia ki jingktah, kiba long ha ki kam bapher bapher kynthup naduh ka jingioh um, ka rep ka riang, ka koit ka khiah u paidbah, ka disaster management bad ka jingshngain ha ka jingdon ka bam.
Ka El Niño, ka rukom long ka suinbneng kaba don jingiasnoh bad ka jingshit ka sla duriaw hapoh ka Pacific Ocean, ka dei kaba don jingiadei ha ki snem bala leit noh bad ka jingkylla ka lyiur ri India, kynthup ka jingduna ioh slap, ka jingrang rkhing ka suinbeng ba neh slem bad ka jingshit kyr-ang bha ka bneng.
Katba ki riewshemphang ki pynpaw ba ki jingktah ia ka Meghalaya ki dei ki bym pat lah ban pynthikna, u Myntri Rangbah ula ban jur ia ka jingdonkam ban hap pynkhreh lypa ia kiei kiei baroh ha ka jaka ban ap haduh ban da shah ktah.
Ka jingkyrduh um kala mih kum kawei na ki kam bala pynleit jingmut bha ha ka jingialang. La bthah ia ki Tnad ba kin pyn sted wut wut ha ka jingshna pynbha ia ki pung um, ki project pynlang um, ka jingpynlang um biang ha mei ramew, bad ka jingshna shuh shuh ia ki pukri pynlang um kiba heh.
Ka Tnad Agriculture kala pyntip ia ka Council ba kala dep don lypa ia ki plan kumno ban leh, bad ki jingpyrshang kila nang iaid ha kaban pynthikna ia ka jinglah ban ioh ia ki symbai jingthung, pynshlur ban thung ia ki jingthung ba shim lyngkot ia ka por bad ban pynkhlain ia ki lad pynpoi um sha ki jaka rep na ka bynta ki nongrep.
Ki Ophisar kila shong bishar ruh halor ki jingthmu ban sam ia ka umbam umdih ha ki khep ba kyrkieh, ka jingpyniaid ia ka kam pynlang marbam bad ka rukom treikam kaba ai jingmaham lypa dang kloi ban pynthikna ia ka jinglah ban leh eiei ha ka por kaba biang lada jia ryngkat ba wan lynshop ka jingrang rkhiang ka bneng lane ka jingthut ka suinbneng.
U Myntri Rangbah ula wer ia ka jingiashimbynta kaba khlain jong u paidbah, kyrpad ia ki shnong ki thaw, ki Dorbar Shnong bad ki Seng kiba don ha ki shnong ki thaw ba kin pynsngewthuh ia ka jingdonkam ban tyngkai ia ka um bad kiwei kiwei.
Haba ban jur ba ki jingpynkhreh lypa ki dei ki lad jingiada ba khlain eh jong ka Jylla haba phai sha ka jingbym thikna ka rukom long ka suinbneng, u Conrad ula bthah ia ki Tnad ba kin pynkylla ia ki plan sha ki kam ba lah ban pyntrei noh bad ban pynthikna ia ka jingpyntreikam lang ia kine ki plan ha ki tnad bapher bapher.
